VOV4.K’ho- Ngai 05/01, Kwang àng càr Gia Lai bơyai lơh Pơrjum tơn jơh broă lơh nam 2021, lam lơh broă lơh, kơnòl broă nam 2022. Đơs bè broă lơh nam 2021, Kwang àng càr Gia Lai neh lam lơh niam ală kơnòl broă, khà lùp khàu, kup bàn ală broă lơh tìs geh rlau 85,3%, tìs kơn jơ̆, kơn jơ̆ ngan là rlau 90,65%. Tàm nam lài, mpồl kwang àng neh kup, hòi jà tơlik mat yal tìs 116 nă cau gơtìp jòi kup, tàm gơ̆ geh 41 nă cau lơh tìs kơn jơ̆ ngan; kup bàn uă anih, mpồl pơndiang, prap ơn, tac bro, lam lơh ngui tìs mờ adat lam ma túy. Bơta rềs àr gùng lòt neh geh tơrmù tàm jơh 3 bơta.

Tàm broă lơh pơgồp bal rơcang sơndră kòp Kovid-19, kwang àng càr Gia Lai neh hòi jà git nđờ rbô dơ̆ kwang bàng, cau ling kwang àng tus bal lơh kơnòl broă. Nam 2022, kwang àng Gia Lai tơrgùm lam lơh ring bal ală rơndap broă sền gàr lơngap lơngai; sơlơ tơnguh rlau tai broă rơcang sơndră cau tìs bơh kấp hơ đơm; mblàng yal, hòi jà nàng kờñ tơrmù lơyah ngan rlau jơh gơlik geh cau tìs; mờ kung pơn jat tai lơh niam broă lơh hòi jà làng bol, sền gàr lơngap lơngai làng bol.

Cau mblàng K’Duẩn