VOV4.K’ho- Nam bơsram pa 2021- 2022 neh mờr tus rềp ngan. Mơya, pơndrờm mờ khà ai cau pơgru tàm dùl ơdŭ, den gah bơto bơtê càr Gia Lai dê kung gam ờ tơl 3 rbô 721 nă cau pơgru bơto ală kấp bơsram.

Ờ tơl pơgru lơh gơlik uă kal ke ai gah bơto bơtê càr Gia Lai in, ngan là broă lơh bơto bơtê tiah jơi bơtiàn kòn cau dùl êt nă cau

Nền cê bè do, jăt tơrgùm kờp bơh Sở Giáo dục mờ Đào tạo càr Gia Lai dê, pơndrờm mờ khà ai, nam bơsram 2021- 2022 do, càr gam ờ tơl 1 rbô 637 nă cau pơgru bơto mầm non; 986 nă pơgru bơto kấp dùl; 726 nă pơgru bơto kấp bàr mờ 372 nă pơgru bơto ƀộ môn tàm kấp pe. Kuơmàng, bơh nam bơsram 2021- 2022, lơh jăt Broă lơh bơto bơtê bal pa, kấp mầm non mờ kấp dùl pal bơsram 2 ƀùi tàm dùl ngai den tàng broă bơtơl pơgru nàng sền gàr bơta niam bơto bơtê là bơta jal mhar ngan.

Tềng đăp bơta geh ngan do, Ủy ban Nhân dân càr Gia Lai neh geh sră pơyua bàr pe ƀộ, gah lơh broă dà lơgar geh gơrềng in, dan ai gơnoar càr in geh rwah, kĭ sră pơrgon, nàng kờñ tơnguh khà pơgru bơto, sền gàr bơta niam bơto mờ bơtê; mơkung ơm ing tơrmù cau lơh broă gah bơto bơtê.

Cau mblàng Lơ Mu K’Yến