VOV4.K’ho- Bŭ lah là dùl tàm ală tiah geh dà tàm càr Dak Lak, mơya kơnhoàl Lăk kung gam gơtìp kal ke tàm broă geh tơl dà ngui sa ai làng bol in, tàm hơ̆ uă ngan là tàm kàl prang geh bal thị trấn Liên Sơn, tềng gah tơnao dà Lăk, tơnao dà geh is dờng ngan tàm Tây Nguyên do, geh uă ngan hìu làng bol kung gam pal blơi dà nàng cèng ngui tàm rài kis. Bơta do  neh geh yal tus mờ anih lơh broă geh gơnoar uă dơ̆, kung uă dơ̆ geh dờp, mơya broă ờ tơl dà gam gơtìp sùm.

Kung bè uă hìu làng bol kis tàm thị trấn Liên Sơn sơl, ồng Ngô Công Tâm, kis tàm mpồl ƀòn Hoà Thắng neh uă ngai do pal blơi dà tàm khàr nàng geh dà hùc mờ trŭ sa. Hìu nhă mìng geh 2 nă ùr bơklao, ngui dà kung pal tềm pềr ngan, mơya pah nhai roh bơh 300 tus 350 rơbô đong priă nàng blơi dà. “Hìu añ gam bàr nă ùr bơklao kra mơ, dùl ngai mìng ngui 1 khàr 20 lĭt dà nàng hùc mờ trŭ sa. Tàm 1 ngai den tàm 30 ngai là roh bơh 300 tus 400 rơbô đong tàm 1 nhai. Dà tơlung den ƀồm kung geh, mơya dà gơtìp mbring, mìng gơtùi um pìh phan mờ rài hìu. Dà ƀô ngir mờ jù bè rơgơi ngui. Làng bol gơtìp glar tài ờ tơl dà ngui sa uă ngan. Tàm ală dơ̆ pơrjum cau tĕ khà ha là pơrjum ƀòn, làng bol, bol añ neh dan tus mờ gơnoar atbồ uă ngan, mơya gơnoar atbồ mìng iăt mơya ờ hềt gŏ bơsong làng bol in sơl”.

Gĭt nđờ rơbô hìu làng bol kis tàm konhoàl Lăk, càr Dak Lak ờ tơl dà ngui sa tàm uă nam do

Gam mò Đoàn Thị Hồng, kis tàm mpồl ƀòn Hoà Thắng đơs là, broă lơh dà măi ai làng bol in tàm tiah do neh gơtìp ờ gơtùi ngui tai mờ lơh broă ờ geh cồng nha. Bơh uă nam do, làng bol ndrờm pal blơi dà khàr ha là dà neh geh ơn lài nàng trŭ sa mờ hùc. Mìng is hìu mò kă bro phan ñô sa, pal blơi dà bơh sơtèk dờng hơ̆ sồng tơl ngui, den tàng hoàc huơr ngan.

Mò Hồng bal mờ gĭt nđờ rơhiang hìu kis tàm do kơ̆p kờñ anih lơh broă geh gơnoar dong kờl, ai tơl bơta niam nàng geh dà sàng ngui sa ring niam. “Hìu añ kă bro phan lơh sràt nàng tăc tàm drà thị trấn den tàng ngui uă ngan dà. Kàl mìu den ngui sơtèk đơ dà ngui, kàl prang den ngui dà măi mơya uă nam do neh gơtìp ờ gơtùi ngui tai den tàng pal blơi dà sơtèk nàng geh ngui. Blơi dà sơtèk den hoàc huơr ngan, kă bro ờ geh priă cồng. Kis tàm thị trấn mờ ờ geh dà sàng kloh niam nàng ngui sa. Làng bol tŭ do mìng kơ̆p gơn bơh dà lơgar sền gròi bơcri priă lơh dà ngui sa nàng làng bol ờ glar bòl tai”.

Jăt bơta sền gròi bơh UBND thị ttrấn Liên Sơn pà gŏ, gùt thị trấn geh 1 rơbô 680 hìu mờ rơlao 6 rơbô 590 nă làng bol, mơya mìng geh 1 broă lơh dà sàng kloh niam mờ bơta pràn 10 khối dà tàm 1 ngai mang.  Broă lơh do neh bơcri priă lơh bơh nam 2000 mờ tŭ do lơh broă ờ geh cồng nha, mìng geh ai geh bơh 90 tus 100 khối dà tàm 1 ngai mang, di pal mờ broă ngui sa geh 1 bơnah 5 khà kờp làng bol.

Dà gơtìp mbring bal mờ ală broă lơh dà măi neh gơtìp ờ gơtùi ngui tai lơh làng bol kis tàm ală tiah tàm kơnhoàl Lăk, càr Dak Lak gơtìp kal ke

UBND thị trấn Liên Sơn kung neh uă dơ̆ pơyoa jơnau dan bơh cau tĕ khà tus UBND kơnhoàl mờ kung neh geh dờp sơl, mơya  tus tŭ do,  tàm thị trấn kung gam ờ hềt geh tai broă lơh dà sàng kloh lơi geh lơh.

Jăt ồng Nguyễn Anh Tú, Kuang atbồ Mpồl atbồ rơndăp broă lơh tàm kơnhoàlLăk yal, uă nam do,  broă ờ tơl dà sàng ngui sa ờ mìng geh tàm thị trấn Liên Sơn mờ gam gơtìp  tàm uă xã tàm kơnhoàl do bè xã Dak Nuê, Dak Liêng, Buôn Tría… dùl bơnah tài ală xã do kis tàm tiah thòng, dà căt gơtìp mbring. Bơnah ndai, tài jơh ală broă lơh dà sàng kloh do ndrờm neh gơtìp ờ niam ờ gơtùi ngui tai.

Ồng Nguyễn Anh Tú yal, mhar ngan kung paltus nam 2023, broă dà ngui sa tàm ală tiah kơnhoàl Lăk hơ̆ sồng geh lơh niam, mờ 4 rơbô 500 hìu làng bol geh ngui dà bơh dùl rơndăp broă lơh 3 rơbô 600 khối dà tàm 1 ngai mang. “Tus tŭ do, HĐND càr Dak Lak neh kĭ gùng dà broă bơcri priă lơh rơndăp broă geh 90 tơmàn đong ai UBND kơnhoàl Lăk in lơh rơndăp broă dà ngui sa. Tơngai sơnrờp nam 2021 do den neh bơcri 5 tơmàn đong nàng sền mờ lơh sră nggal lơh broă. Mờ pơn jăt tai, nam 2022 jăt rơndăp broă geh ai bơcri priă bơh sở Kế hoạch đầu tư dê den geh pơn jăt tai lơh jăt tơngai dơ̆ 2 bơh rơndăp broă do dê geh lơh gơs tàm nam 2023 mờ geh ai ngui”.

Cau mblàng Ndong Brawl