VOV4.K’ho-Ngai 26/7, Lâm Đồng pơn jat tai sền gŏ 5 nă cau bơtờp kòp Covid-19, tơnguh khà cau kòp tàm gùt càr gơguh 40 nă. Tàm khà do, geh 6 nă cau neh geh sơm bời kòp. Tàm khà 5 nă cau bơtờp kòp pa, geh 2 nă cau là cau măy rơndeh pơndiang phan bơna rê bơh ƀòn dờng Hồ Chí Minh, 2 nă cau là F1- là pơ ùr mờ kòn bơh dùl tàm 2 nă cau măy rơndeh do dê mờ 1 nă cau kòp sền gŏ bơh kham sac rơwah tàm mpồl bơtiàn. Gơrềng tus ală cau bơtờp kòp pa, mpồl lơh broă geh gơnoar càr Lâm Đồng neh lơh broă lơh jòi gĭt tiah lòt rê mờ sền gŏ 66 nă cau F1, 189 nă cau F2, mơkung pơn jat tai lam lơh broă lơh căng tiah kơryan kòp, gròi sền tiah lòt rê mờ lòt jòi cau geh gơrềng tus 15 tiah geh bơta pơhìn bơtờp kòp tàm 2 kơnhoàl Đức Trọng mờ Đơn Dương. Bơdìh mờ broă lòt jòi cau geh gơrềng tus mờ 5 nă cau bơtờp kòp pa tàm càr dê, Lâm Đồng kung gam mhar ngan jòi gĭt tiah lòt rê ală cau ơm rềp mờ cau kòp sồ 95575  tàm Ninh Thuận. Lài hơ̆, cau kòp do ơm mờ lơh broă tàm ƀòn dờng Dà Làc, geh ơm rềp mờ uă cau.

Thôn Phi Nôm, xã Hiệp Thạnh, kơnhoàl Đức Trọng, càr Lâm Đồng gam lơh jat niam broă ai ơm yah ngài mpồl bơtiàn jat Chỉ thị sồ 16 bơh Thủ tướng Chính phủ dê

Kờp tus 12 jiơ klo ngai, ngai 26/7, Lâm Đồng geh 40 nă cau kòp Covid-19. Gùt càr gam lơh jat broă ai ơm yah ngài 5 rơbô 643 nă cau. Broă lơh rcang sơndră kòp Covid-19 gam geh ală mpồl lơh broă geh gơnoar tàm càr jơh nùs lam lơh.

Cau mblàng K’Hạnh