VOV4.K’ho - Mho òr (17/05), Ủy ban tĕ khà càr Lâm Đồng neh bơyai lơh pơrjum ƀăo nàng yal bè ală jơnau yal gơrềng tus mờ broă rơcang tĕ khà mờ ală gùng dà broă đùh sră bơh ală cau tĕ khà gam lơh jăt broă tam cah is, jăt broă sền gròi bơh gah lơh sơnơm nàng rơcang sơndră mờ kòp Covid-19 tàm càr do.

Tŭ do, broă rơcang tĕ khà kuang bàng Quốc hội khoă 15 mờ kuang bàng HĐND ală cấp tàm càr Lâm Đồng neh geh lơh gơs. Jăt Sở Y tế càr Lâm Đồng yal, tŭ do càr Lâm Đồng ờ hềt geh dờp cau lơi geh gŏ mờ kòp Covid-19. Gùt càr gam lơh jăt broă tam cah is 588 nă cau, tàm hơ̆, tam cah is 16 nă cau tàm hìu sơnơm, 338 nă cau tàm ală tiah tam cah is tơrgùm bal mờ 234 nă cau geh tam cah is tàm hìu. Kờñ gàr niam broă sơndră mờ kòp Covid-19, pleh mờ gơtờp kòp tàm broă lòt đùh sră, ală cau do geh lòt đùh sră tơn tàm tiah tam cah is.

Cau mblàng Ndong Brawl