VOV4.K’ho- Ủy ƀan Nhân dân càr Lâm Đồng pa geh sră ring bal gùng dà lơh niam wơl mờ lơh ơnàng gùng kuèl kơh Prenn, gùng mŭt tàm ƀòn dờng Dà Làc nàng lơh geh jơnau kờñ lòt rê, bơsong bơta hat hal ir rơndeh, gơkòl rơndeh gơbàn tàm ală tŭ geh uă rơndeh lòt rê geh gal năc lòt nhơl.

Rơndăp broă lơh lơh niam wơl mờ lơh ơnàng kuèl kơh Prenn geh bơta jòng kờp jơh là 7 kơi sồ 4, anih sơnờp tàm tơrbŏ bal bơh gùng rơndeh ntoăt răt Liang Khàng- Prenn, anih dŭt ndơl rềp mờ gơl gùng kuèl kơh Prenn mờ gùng ngai 3 nhai 4 gơwèt sơnah ƀòn 3, ƀòn dờng Dà Làc, mờ kờp jơh priă tă lơh là 514 tơmàn đong. Rơndăp broă lơh geh lơh ơnàng 4 bơnàng gùng rơndeh ô tô lòt jăt tơl jơnau sồr gùng kấp 3 tiah bơnơm, bơta răt rơndeh lòt geh rơndăp lơh 60 kơi sồ tàm dùl jiơ, bơnàng gùng ơnàng 15 thơk, mờ măt gùng 14 thơk. Tàm gơl gùng geh rơndăp lơh dùl nơm rbàng hơđang jòng 120 thơk nàng lơh niam wơl gùng kuềt, pơgồp mờ rơndăp lơh krơh triang sền ù tiah brê bơnơm, geh 2 nơm gùng pleh rềs àr.

Cau mblàng Lơ Mu K’Yến