VOV4.K’ho-  Cau măy rơndeh bơtờp kòp Covid-19 là bi N.M.T. (33 sơnam, ơm tàm thôn 5, xã Đinh Trang Thượng, kơnhoàl Di Linh), là cau kòp sồ 41056 mơ là cau kòp Covid-19 dơ̆ 15 bơh càr Lâm Đồng dê.

         Lâm Đồng gam tơrgùm jòi gĭt tiah lòt rê, ai ơm yah ngài mờ xét nghiệm ală cau ơm rềp mờ cau kòp

Jat lùp tiah lòt rê, bi T ơm tàm Công ty Thiên Anh, quận 12, ƀòn dờng Hồ Chí Minh. Pơgap 12 jiơ klo ngai 12/7, bi T đì rơndeh măy rê tàm kơnhoàl Di Linh. Tŭ tus Anih gròi sền kòp tàm koèl kơh Chuối (gơwèt kơnhoàl Dà Huoai, càr Lâm Đồng) bi T yal tiah lòt rê mờ gah lơh sơnơm mơya ờ gŏ yal song, đơs blac là rê bơh Madaguoi (kơnhoàl Dà Huoai) den geh ai lòt gan anih gròi sền kòp. Ngai 15/7, bi T đì rơndeh măy tus Hìu sơnơm sơnah ƀòn B’lào, ƀòn dờng Bảo Lộc nàng test mhar kòp Covid-19, cồng nha 2 dơ̆ test ndrờm bơtờp kòp. Tơnơ̆ hơ̆ bi T geh ai mẫu xét nghiệm RT-PCR tàm hìu sơnơm dờng 2 Lâm Đồng mờ sền gŏ bơtờp mờ virus Sars CoV-2.

Jat ồng Nguyễn Đức Thuận, Kuang atbồ Sở Y tế càr Lâm Đồng yal, gah lơh sơnơm mhar ngan pơgồp bal mờ ală mpồl lơh broă geh gơnoar lơh jat broă jòi gĭt tiah lòt rê mhar mờ geh 5 nă cau F1 mờ 9 nă cau F2 ơm rềp mờ ală cau kòp. Jơh ală cau do xét nghiệm ndrờm ai cồng nha ờ bơtờp kòp. Tŭ do broă lơh jòi gĭt tiah lòt rê, ai ơm yah ngài mờ gròi sền tiah lòt rê mờ ală cau geh gơrềng tus cau kòp gam geh ală mpồl lơh broă geh gơnoar càr Lâm Đồng lơh ngan lam lơh.

Cau mblàng K’Hạnh