VOV4.K’ho- Drim ngai 08/10, Lâm Đồng pơn jat tai sền gŏ 30 nă cau bơtờp kòp Covid-19, tàm hơ̆ geh 25 nă cau geh gơrềng tus tiah kòp ƀòn bơkào Vạn Thành, sơnah ƀòn 5, ƀòn dờng Dà Làc. Tŭ do, Mpồl đơng lam rcang sơndră kòp càr Lâm Đồng neh sồr Anih gròi sền kòp tê jê să càr Lâm Đồng mờ ală mpồl lơh broă geh gơrềng mhar bơyai lơh dơ̆ lùp sền, jòi gĭt tiah lòt rê, căng tiah, ai ơm yah ngài, ai mẫu kòp ală cau geh gơrềng.

Mpồl lơh broă geh gơnoar wàng se ƀòn bơkào Vạn Thành nàng kơryan kòp

Bơdìh mờ tiah kòp ƀòn bơkào Vạn Thành, gah lơh sơnơm càr Lâm Đồng kung sền gŏ tai 5 nă cau bơtờp kòp Covid-19 pa, tàm hơ̆ geh 2 nă cau là ùr bơklau bơh cau măy rơndeh pơndiang phan tàm càr, 2 nă cau rê bơh ƀòn dờng Hồ Chí Minh mờ cau gam wơl rê bơh càr Bình Dương. Bè hơ̆, kờp tus ndrim ngai 08/10, càr Lâm Đồng geh 322 nă cau bơtờp kòp Covid-19, tàm hơ̆ geh 264 nă cau neh bời kòp mờ ai rê bơh hìu sơnơm. Tŭ do Lâm Đồng gam ai ơm yah ngài 5 rơbô 921 nă cau, tàm hơ̆ geh 95 nă cau ai ơm yah ngài tàm hìu sơnơm, 3 rơbô 180 nă cau ai ơm yah ngài tơrgùm bal mờ 2 rơbô 646 nă cau ai ơm yah ngài tàm hìu.

Cau mblàng K’Hạnh