VOV4.K’ho- Mho ngai 5/7, càr Lâm Đồng geh tai 1 nă cau bơtờp mờ virus Sars CoV-2. Do là cau kòp geh gơrềng tus cau kòp Covid-19 sơnrờp tàm càr dê. Cau kòp pa do là ồng T.X.C. (56 sơnam) cau ơm rềp bal mờ cau ùr kòp sồ 17951 (ơm tàm  thôn Phú Hòa, xã Mỹ Đức, kơnhoàl Dà Teh, càr Lâm Đồng), cau rê bơh Hóc Môn, ƀòn dờng Hồ Chí Minh. Ồng C là dùl tàm ală cau F1 den lài hơ̆ neh di tŭ ai ơm yah ngài, kham să jan bơh gah lơh sơnơm dê mờ ai mẫu xét nghiệm ai cồng nha bơtờp kòp. Tơnơ̆ tŭ sền gŏ cau kòp Covid-19 do tơn, gah lơh sơnơm càr Lâm Đồng neh jun ồng T.X.C bơh tiah ai ơm yah ngài tơrgùm bal tus anih ai ơm yah ngài mờ sơm kòp tàm kơnhoàl Dà Teh.

Gah lơh sơnơm càr Lâm Đồng lơh pràn broă jòi gĭt tiah lòt rê mờ xét nghiệm kòp Covid-19 ai làng bol in

Bè hơ̆, tus tŭ do, càr Lâm Đồng neh geh 6 nă cau kòp Covid-19. Tŭ do broă lơh jòi gĭt tiah lòt rê geh gơrềng tus ală cau kòp kung gam geh càr Lâm Đồng lơh ngan lam lơh.

Cau mblàng K’Hạnh