VOV4.K’ho- Drim ngai 01/7, Hội đồng Nhân dân càr Lâm Đồng khoá X, tơngai lơh broă bơh nam 2021- 2026 neh bơyai lơh pơrjum dơ̆ sơnrờp nàng pồ ală gơnoar broă gơwèt gơnăp gơnoar mờ ring bal bàr pe sră yal kuơmàng. Tàm dơ̆ pơrjum, Ủy ban Tĕ khà càr Lâm Đồng neh yal cồng nha tĕ khà, dờp gơnoar broă mờ jàu sră cơng tàng ai 66 nă kuang bàng Hội đồng Nhân dân càr khoá X, tơngai lơh broă bơh nam 2021- 2026 in.

Pơrjum dơ̆ sơnrờp Hội đồng Nhân dân càr Lâm Đồng khoá X, tơngai lơh broă bơh nam 2021- 2026

Ală kuang bàng kung neh đùh sră pồ ală gơnoar broă tờm ngan bơh Hội đồng Nhân dân càr mờ Ủy ban Nhân dân càr dê, pồ Kuang ătbồ Ban, Phó Kuang ătbồ Ban mờng lơh kơnòl broă ală ban lơh kơrnoat boh lam, lơh sa- kes priă, niam chài- mpồl bơtiàn mờ ban jơi bơtiàn kòn cau, Mpồl duh broă cah rña làng bol mờ ală kuang bàng geh jơng tàm Ủy ban Nhân dân càr dê.

Ồng Trần Đức Quận- Ủy viên Đảng Dà lơgar, Bí thư Tỉnh ủy Lâm Đồng geh pồ ăt tai gơnoar broă Chủ tịch Hội đồng Nhân dân càr khoá X

Ồng Trần Đức Quận, Ủy viên Đảng dà lơgar, Bí thư Tỉnh ủy, Chủ tịch Hội đồng Nhân dân càr khoá IX pơn jăt tai geh pồ ăt gơnoar broă Chủ tịch Hội đồng Nhân dân càr Lâm Đồng khoá X; Ồng Trần Văn Hiệp- Phó Bí thư Tỉnh ủy, Chủ tịch Ủy ban Nhân dân càr khoá IX geh pồ lơh Chủ tịch Ủy ban Nhân dân càr khoá X, tơngai lơh broă bơh nam 2021- 2026. Dơ̆ pơrjum gam lời tŭ jiơ nàng cribơyai, pờ tê mờ ring bal ală kơrnoat bè Broă rơndăp lơh bơyai lơh ală dơ̆ pơrjum ờs mờng nam 2021 bơh Hội đồng Nhân dân càr khoá X, Kơrnoat ring bal gùng dà broă lơh tam pà broă rơndăp lơh bơcri priă dà lơgar di mơ tơngai, tơngai bơh nam 2021- 2025.

Cau mblàng Lơ Mu K’Yến