VOV4.K’ho- Ủy ban Nhân dân càr Lâm Đồng neh geh dơ̆ lơh broă mờ Ủy ban Cau Việt Nam ơm tàm lơgar ndai tàm ƀòn dờng Hồ Chí Minh bal mờ ală cau lơh sa kă bro là cau Việt Nam ơm tàm lơgar ndai, cau lơgar ndai, nàng kờñ yal tơngĭt ală jơnau yal, tàm tơrbŏ ală cau bơcri priă, mpồl lơh sa kă bro, cau Việt Nam ơm tàm lơgar ndai, nàng hòi jà lơh ală rơndăp broă lơh tàm càr.

Càr Lâm Đồng neh yal mờ mpồl lơh broă bơh Ủy ban Cau Việt Nam ơm tàm lơgar ndai tàm ƀòn dờng Hồ Chí Minh in mờ mpồl bơtiàn ală cau bơcri priă, mpồl lơh sa kă bro, cau lơh sa kă bro là cau Việt Nam ơm tàm lơgar ndai bè bơta pràn, bơta geh bơh càr Lâm Đồng dê; yal tơngĭt jơnau yal ală rơndăp broă lơh gam hòi jà bơcri priă, bè: Rơndăp broă lơh tiah nhơl chờ tơnau dà Prenn, Rơndăp broă lơh Tiah drà Liang Khàng- Prenn, Tiah nhơl dà Dà lơgar tơnau dà Tuyền Lâm.

Ồng Steve Bùi, Kuang ătbồ dờng Tập đoàn Delta E & C Japan pà gĭt, dơ̆ lòt sền nàng gĭt ngan ngồn do geh gơ gơs là rbàng tơrbŏ, bơnàng jă bơh sơnrờp kuơmàng pờ tơlik uă tŭ tơngai ai ală mpồl lơh sa kă bro, cau lơh sa kă bro là cau Việt Nam ơm tàm lơgar ndai in tus bal bơcri priă tàm Lâm Đồng.

 Cau mblàng Lơ Mu K’Yến