VOV4.K’ho- Drim ngai 17/5, Ủy ban Nhân dân càr Lâm Đồng geh sră nggal ring bal rơndap broă ai kơnòm bơsram phổ thông, kơnòm bơsram, cau bơsram dờng ală hìu bơsram tàm càr pơn jat tai bơyai lơh pơrlòng học kỳ 2 tàm 3 ngai mờ pal lơh gơs lài mờ ngai 21/5 do. Bơh jơnau sồr bơh Sở Giáo dục mờ Đào tạo càr Lâm Đồng dê, Ủy ban Nhân dân càr Lâm Đồng ring bal ai kơnòm bơsram, cau bơsram dờng ală khối, ơdŭ bơsram ờ hềt pơrlòng jơh học kỳ 2 pơn jat tai bơyai lơh pơrlòng tàm ală ngai 19, 20 mờ 21/5; ală cau ndai pơn jat tai ơm rlô bơsram.

Tơn jơh dơ̆ pơrlòng do, ală kơnòm bơsram, cau bơsram dờng tàm càr pơn jat tai rlô bơsram nàng rơcang sơndră kòp Covid-19. Gơwèt mờ kơnòm bơsram khối 12, Ủy ban Nhân dân càr sồr Sở Giáo dục mờ Đào tạo càr pơlam bơyai lơh bơto bơtê jơnau pơrlòng jơh bơsram kấp 3 mờ broă lơh pờ tơlik tơn tàm internet. Mìng is ală tiah kal ke, tiah làng bol jơi bơtiàn kòn cau dùl êt nă cau, ờ geh tơl phan bơna, kỹ thuật nàng pơlam lơh jơnau pơrlòng pờ tơlik tơn tàm internet den gơtùi bơyai lơh pơlam lơh jơnau pơrlòng tơrgùm bal mơya pal gàr kloh niam, lơh kloh khuẩn hìu bơsram, ơdŭ bơsram, phan bơna phan ngui bơto bơsram lài mờ tŭ kơnòm bơsram tus hìu bơsram. Tàm tơngai ală kơnòm bơsram tus hìu bơsram, bañ tơrgùm rlau 30 nă kơnòm bơsram tàm dùl ơdŭ mờ pal pơn chèu glòm muh mat, lơh kloh khuẩn, yal bè pràn kơldang să jan, ơm yah ngài, lơh jat ală jơnau sồr bè rơcang sơndră kòp.

Cau mblàng K’Duẩn