VOV4.K’ho- Klo ngai 19/11, anih lơh broă geh gơnoar kơnhoàl Lâm Hà, càr Lâm Đồng neh jà mờ jun dùl nă cau klau bơtờp kòp Covid-19 wơl rê wơl tàm tiah ơm yah ngài sơm kòp tơnơ̆ dùl ngai dô pồn. Cau klau dô pồn bơh tiah ơm yah ngài sơm kòp là ồng C.P ơm tàm xã Phước Chính, kơnhoàl Ƀác Ái, càr Ƀình Thuận. Lài hơ̆, tàm ngai 16/11, ồng C.P lòt rơndeh măy tus tàm kơnhoàl Lâm Hà, càr Lâm Đồng dê nàng pik kơphê apah.

Ồng C.P geh anih lơh broă geh gơnoar ai mẫu test mhar mờ xét nghiệm PCR ndrờm gơ ai cồng nha bơtờp mờ virus Sars CoV-2 mờ geh jun lòt ơm yah ngài tơrgùm bal tàm tiah sơm kòp cau kòp Covid-19 tàm xã Tân Văn, kơnhoàl Lâm Hà. Tus mho ngai 18/11, ồng C.P neh dô pồn bơh tiah ơm yah ngài sơm kòp. Tơnơ̆ tŭ gŏ broă do tơn, kơnhoàl Lâm Hà neh tơrgùm mpồl cau lòt jòi. Tơnơ̆ dùl ngai lơh ngan jòi, klo ngai 19/11, anih lơh broă geh gơnoar gŏ ồng C.P gam dô pồn tàm dùl tờm chi jơnhoa tàm tiah do. Tơnơ̆ hơ̆, ala măt gơnoar ătbồ tiah do, ală mpồl lơh broă geh gơnoar neh hòi jà ngan mờ jun geh ồng C.P wơl rê wơl tàm tiah ơm yah ngài sơm kòp ai cau kòp Covid-19 in.

Cau mblàng Lơ Mu K’Yến