VOV4.K’ho - Là tiah rềp bal mờ ƀòn dờng Dà Làc, do là tiah geh khà cau gơtìp mờ kòp Covid-19 uă ngan càr Lâm Đồng dê, mơya kơnờm mờ nùs nhơm git tam klăc bal tàm broă rơcang sơndră mờ kòp, kơnhoàl Lạc Dương gam là “tiah tơlir” ờ hềt geh gŏ cau gơtìp kòp Covid-19 lơi. Nàng pơn jăt tai geh cồng nha do, làng bol kis tàm ală ƀòn tàm kơnhoàl do gam crơng gơs ală mpồl sền gàr is tiah tơlir, ai cau sền gàr sùm ngai kung bè mang nàng git ală broă lik mŭt tàm ƀòn ơm kis.

Tơngai do, bŭ lah trồ tơngai ha là trồ mìu, rơlao 10 nă cau tàm mpồl sền gàr is tiah tơlir bơh ƀòn 1, xã Dà Sar, kơnhoàl Lạc Dương dê kung gam sùm lơh broă mờ lơh niam kơnòl rơcang sơndră mờ kòp Covid-19 bơh să tờm dê.

Ală rơndeh lik mờ mŭt tàm ƀòn ndờm geh mpồl sền gàr is tiah tơlir cih ală jơnau tơngit gơrềng bal

Bơh bồ gùng dă mờ bê tông mŭt tàm ƀòn sùm geh cau sền gàr ngai kung bè mang nàng sền gròi ală broă lik mờ mŭt tàm ƀòn, tàm hơ̆ uă ngan là ală rơndeh bal mờ cau krơi bơh tàm tiah ndai tus. Ồng Păng Ting Doanh, atbồ Mpồl sền gàr is ƀòn pà git, bŭ lah broă lơh do gơtìp kal ke, mơya ală cau tàm mpồl sền gàr is ƀòn kung gam ai tơngai, tam pà bal sền gàr, gàr niam broă sền gàr tiah tơlir-tiah ờ do ờ dă ờ geh kòp Covid-19 ai ƀòn lơgar in. “Tŭ geh cau krơi tus den he cih loh ƀàng sồ rơndeh, măt sơnđan, anih ơm tàm ƀòn lơi. Mìng is broă lòt sền gròi sùm là geh lơh jăt bơh jŏ bloh. Làng bol kis tàm do lơh jăt niam ngan broă yal gah lơh sơnơm, lơh jăt 5K, do là bơta chờ hờp ngan, ờ kal ke ai mpồl lơh broă rơcang sơndră mờ kòp Covid-19 in. Añ kơ̆p kờñ là pal geh sùm mờ lơh uă rơlao tai broă lơh do nàng gàr niam broă rơcang sơndră mờ kòp gơtờp niam ờ do ờ dă, dùl nă cau tài ală cau”.

Geh bal ală cau tàm ƀòn di lah lik lòt tàm tiah ndai kung pal cih yal broă lơh sơnơm tơl

Xã Dà Sar, kơnhoàl Lạc Dương rềp bal mờ ƀòn dờng Dà Làc, mờ geh ơm tềng gùng 27C tai den tàng pah ngai geh uă ngan cau lik mờ mŭt tàm do. Ồng Phạm Ngọc Giáo, kis tàm sơnah ƀòn 9, ƀòn dờng Dà Làc, là cau sùm lòt gan tềng anih gròi sền kòp Covid-19 do pà git, tài geh suơn lơh broă tàm tiah do den tàng pah ngai ồng bal mờ uă cau bơh tàm tiah ndai tus tàm do. Pah dơ̆ lòt rê ndrờm pal lơh jăt broă yal lơh sơnơm tơl, bŭ lah gơtìp roh tơngai mơya do là broă lơh geh kuơ. Ồng Giáo pà git: “Bè do là niam ngan, tài he pal lơh tài mpồl bơtiàn, bañ lời mpồl bơtiàn tài he. Gơwèt mờ să tờm añ, do là dùl broă lơh niam ngan tàm bơta kòp gơtờp do, tài di pal ngan. Kòp gơtờp tŭ do he ờ sền gŏ, den tàng ờ git bè lơi, gơ-ơm tàm tiah lơi den tàng broă rơcang sơndră lài là niam ngan”.

Ală anih gròi sền bơh mpồl sền gàr is tiah tơlir kơnhoàl Lạc Dương pơgồp bal kuơ màng tàm broă rơcang sơndră mờ kòp Covid-19 tàm tiah do

Ờ mìng xã Dà Sar, ală ƀòn, mpồl ƀòn tàm ală xã, thị trấn tàm kơnhoàl Lạc Dương ndrờm crơng gơs mpồl cau sền gàr is tiah tơlir, tiah ờ geh kòp Covid-19 mờ geh làng bol ring nùs kờñ bal. Jăt lŏ Kơ Să Ka Liêm, Bí thư Đoàn xã Dà Nhim yal, lài do làng bol kis tàm ƀòn ờ hềt git mờ kơnòl ờ hềt geh uă tàm broă lơh jăt ală broă rơcang sơndră mờ kòp Covid-19. Bơh ngan crơng gơs mpồl sền gàr is tiah tơlir, ală cau tàm mpồl chồl pràn broă lam sồr den tàng tŭ do cau lơi kung lơh jăt niam broă pơn chèo, yal broă lơh sơnơm pah tŭ lik bơdìh ƀòn. “Crơng gơs anih sền gròi den ngai sơnrờp kung kal ke, mơya tơnơ̆ mờ hơ̆ tài geh lam sồr làng bol, den tàng làng bol geh tơnguh jơnau git wă tàm broă rơcang sơndră mờ kòp, den tàng kung ờ gam kal ke tai. Tŭ do làng bol, tàm hơ̆ geh bal ơruh pơnu kung neh lơh jăt niam broă rơcang sơndră mờ kòp gơtờp. Sùm pơn chèo mờ ală broă lơh jăt jơnau sồr 5K tŭ lik bơdìh”.

Lạc Dương là kơnhoàl geh uă ngan làng bol là kòn cau K’ Ho ơm kis. Mơya là tiah rềp bal mờ ƀòn dờng Dà Làc, là tiah geh khà cau gơtìp kòp Covid-19 uă ngan tàm càr, mơya Lạc Dương tŭ do gam là tiah ờ hềt geh gŏ cau gơtìp mờ kòp Covid-19 lơi. Kờñ geh cồng nha do, bơdìh mờ broă lơh ngan bal bơh mpồl lơh broă geh gơnoar tàm ƀòn lơgar, ală mpồl cau sền gàr is tiah tơlir tàm ală ƀòn geh gơnoar kuơ màng ngan, pơgồp bal uă ngan tàm broă rơcang sơndră mờ kòp Covid-19 kơnhoàl Lạc Dương dê đơs is mờ càr Lâm Đồng đơs bal.

Cau cih Quang Sáng-Cau mblàng Ndong Brawl