VOV4.K’ho- Ngai 06/10, UBND càr Lâm Đồng geh sră nggal sồr ală gah, sơnah lơh broă, mpồl cau mờ UBND ală kơnhoàl, ƀòn dờng tàm càr rcang lài cĭt sơnơm vaccine rcang sơndră kòp Covid-19 bal mờ khà uă.

Lâm Đồng gam bơt bơtàu broă rơndap lơh cĭt sơnơm vaccine rcang sơndră kòp Covid-19 bal mờ khà uă

UBND càr Lâm Đồng jàu Sở Y tế càr dê đơng lam, pơgồp bal mờ ală gah, sơnah lơh broă geh gơrềng mờ UBND ală kơnhoàl, ƀòn dờng tàm càr bơt bơtàu gùng dà broă lơh, rcang lài phan bơna, măy mok sơnơm tơm ba, mpồl cau lơh broă lam lơh cĭt sơnơm vaccine bơh tŭ do tus lồi nam 2021. Bal mờ hơ̆, lơh dơ̆ kờp sền, tơrgùm khà cau mờ cih mat jơh khà cau geh ai cĭt lài jat jơnau sồr. Càr pa dờp geh 200 rơbô ding vaccine Vero Cell bơh Bộ Y tế dê tàm pà mờ gam dơ̆ lĕ bal lam lơh cĭt ding dơ̆ 1 tàm ală kơnhoàl, ƀòn dờng tàm càr. Bal mờ rlau 233 rơbô ding vaccine neh geh cĭt rcang lài bơh lài mờ broă rơndap lơh kờp dŭ tam pà ală khà vaccine rcang sơndră kòp Covid-19 tàm tơngai tus, tus lồi nam do, Lâm Đồng geh lơh geh khà 70% khà kờp làng bol hơđang 18 sơnam geh cĭt vaccine.

Cau mblàng K’Hạnh