VOV4.K’ho- Ban Dân tộc càr Lâm Đồng pà git, tơnơ̆ tơngai sac rơ wah bơh bơta pin dờn làng bol jơi bơtiàn kòn cau dùl êt nă cau tàm ală thôn, ƀòn dê... tus tŭ do neh ring bal tơmut tàm sră cih mat 479 nă cau geh bơngă pin dờn. Mat do kung neh geh Ủy ban Nhân dân càr ring bal.

Ală cau ơm tàm sră cih mat do ndrờm là cau geh bơngă pin dờn, cau geh pơn rơ gơguh jak, geh tă pơgồp mờ geh gơ rềng uă ngan tàm jơi nòi, ƀòn lơgar, ờ uă cau gam geh bơngă pin dờn tàm ală kấp xã, kơnhoàl, ƀòn dờng... Khi kung là cau lam lài tàm bơtàu tơnguh lơh sa, hòi jà jơi nòi mờ ƀòn lơgar lơh jat niam ală jơnau hơ pơrgon, kơrnuat ƀòn lơgar dê, sang tĕ ală bơhiàn ờ niam, lơh jat niam chài rài kis pa. Ală cau geh pơn rơ gơguh jak, cau geh bơngă pin dờn gùt càr kung neh lam lơh niam broă hòi jà làng bol jơi bơtiàn kòn cau dùl êt nă cau lơh ngan lơh sa; lơh jat nền nòn ală gùng dà bơh Đảng, bơta dong kờl, adat boh lam bơh dà lơgar dê, pơgồp bơnah lam lơh jai pha ală jơnau kờñ bơtàu tơnguh lơh sa – mpồl bơtiàn, sền gàr kơ̆ lơngap lơngai chính trị, ờdo ờdă mpồl bơtiàn bơh càr dê.

Cau mblàng K’Duẩn