VOV4.K’ho- Bulah broă lơh yal lài, rơcăng lài, sơndră wơl mờ bơta mìu nhàc càl rbŭt dờng sùm geh càr Lâm Đồng sơlơ lơh uă mờ lơh pràn, mơta bơta hoàc hươr tài bơh trồ tiah lơh aniai tàm càr do kung gam uă ngan sơl. Bơh bồ kàl mìu tus tŭ do, càr Lâm Đồng geh 20 dơ̆ mìu càl rbŭt dờng mờ mìu piar, 12 dơ̆ càl gơ pồt pràn, 2 dơ̆ tơrlah ù mờ 5 dơ̆ kơnàs còng lơh 2 nă cau chơ̆t mờ 2 nă cau gơtìp sồt să.

Trồ tiah lơh aniai kung neh lơh rlau 1 rbô 300 lồ chi tam gơtìp aniai mờ sơrbì jơh, 1 lồ 2 sào măt dà ròng ka gơtìp dà cò pơrdô jơh, 379 nơm hìu bal mờ 20 lồ hìu krơh, hìu jàl mờ 3 nơm hìu duh broă dà lơgar gơtìp aniai jơh...kờp jơh hoàc hươr là 53 tơmàn đong. Jăt ồng Nguyễn Hà Lộc- Kuang ătbồ Chi cục bơtơ̆t rbòng dà càr Lâm Đồng, là kuang bàng tàm Mpồl đơng lam rơcăng sơndră trồ tiah lơh aniai mờ lòt jòng dong kơl rềs àr càr Lâm Đồng dê yal, bulah 68 anih was dà mìu is bơh càr dê neh ai lơh broă geh cồng nha, bal mờ bơta gĭt wă mờ bơta chài tàm tŭ rơcăng sơndră trồ tiah lơh aniai bơh kuang bàng mờ làng bol dê neh geh tơnguh uă tai, mơya bơta trồ tiah gơbàn kal ke den tàng hoàc hươr tài bơh trồ tiah lơh aniai tàm ù tiah càr dê kung gam uă sơl. Nàng tơrmù ƀà tus bơta êt ngan rlau jơh bơta hoàc hươr, bơdìh mờ lơh mờ măy mok lơm broă lơh yal tơngĭt lài, yal tơngkah lài trồ tiah lơh aniai, càr gam tơrgùm lơh jăt ală broă lơh sền gàr ờdo ờdă tơnau dơng dà, bơtơ̆t dơng dà.

Cau mblàng Lơ Mu K’Yến