VOV4.K’ho- Ngai 08/6, Ủy ban Nhân dân càr Lâm Đồng neh geh sră nggal jal mhar bè broă ai gơnoar pơndiang nac wơl mơya pal lơh jat nền nòn 2, 3 broă lơh rơcang sơndră kòp Covid-19. Nàng gàr geh cồng nha lơh jat kơnòl broă dơ̆ lĕ bal, ờ mìng lơh jat ală broă lơh rơcang sơndră kòp Covid-19 mờ gam bơtàu tơnguh lơh sa, Ủy ban Nhân dân càr Lâm Đồng sồr ală sở, mpồl, gah broă lơh, mpồl cau mờ Ủy ban Nhân dân ală kơnhoàl, ƀòn dờng tàm càr, kờp bơh 12 jơ mho ngai 08/6, ai gơnoar broă pơndiang nac geh lơh broă wơl mơya pal lơh jat nền nòn ală broă lơh rơcang sơndră kòp Covid-19.

Ủy ban Nhân dân càr Lâm Đồng kung sồr Sở Giao thông Vận tải càr dê cribơyai, lơh broă mờ Sở Giao thông Vận tải ală càr, ƀòn dờng geh gơ rềng nàng ring bal pơlam ală broă lơh tàm atbồ broă lơh pơndiang nac, gàr broă sền gròi jơnau lơh bơtờp kòp mơya ờ gŏ di kơryan jơh ală broă lơh, ờ lơh gơbàn kòl gùng lòt halà lơh gơ rềng ờ niam tus broă lơh sa kă bro; lơh jat broă tam cah is gơ wèt mờ cau tus bơh tiah geh kòp; lơh glài kràñ ală cau ờ yal halà yal bè pràn kơldang să jan gah lơh sơnơm in ờ ngan.

Cau mblàng K’Duẩn