VOV4.K’ho- Tơnơ̆ uă dơ̆ tơn jŏ tơngai, tus tŭ do, broă tă sờr git nđờ rhiang hìu krơh geh lơh tìs mờ adat boh lam tàm ù brê bơh càr Lâm Đồng dê kung ờ hềt gơtùi lơh sơl. Jat sền sơ wì, lòt sền bơh anih lơh broă geh gơnoar càr Lâm Đồng dê, gùt càr geh rlau 227 lồ hìu krơh, hìu jàl geh lơh tìs mờ adat boh lam tàm ù brê. Tàm hơ̆ tơrgùm uă ngan rlau jơh là tàm ƀòn dờng Dà Làc mờ mờr 185 lồ, pơn jat hơ̆ là kơnhoàl Lạc Dương rlau 21 lồ, Đơn Dương 16 lồ, gam wơl rah rài tàm ală kơnhoàl Đức Trọng, Đam Rông mờ Di Linh.

Bulah lài hơ̆ Ủy ƀan Ñân zân càr Lâm Đồng neh geh sră nggal sồr ală kơnhoàl, ƀòn dờng mờ mpồl lơh broă geh gơ rềng lam lơh broă lơh tă sờr lài mờ ngai 30/9/2021, mơya tus tŭ do kờp jơh bă ù hìu krơh neh tă sờr mìng hơ đơm 10%. Jat Sở Nông nghiệp mờ Phát triển Nông thôn càr Lâm Đồng yal, bơh tài geh broă lơyài do là tài ală sră nggal rồn bơklơn tă sờr kal ke, làng bol gam tam phan den tàng sồr pal tơn jŏ tơngai nàng hòi jà làng bol.

Cau mblàng K’Duẩn