VOV4.K’ho- Bulah gơtìp gơ rềng tài bơh kòp Covid-19, mơya tàm quý 1 nam do, ală tiah tàm càr Lâm Đồng kung gam lơh gơlik bơta ƀuơn ai geh broă lơh mờr 6 rbô nă cau in, pơgồp bơnah tơnguh priă jền lơh geh, gàr kơ̆ kơljap rài kis. Tàm khà mờr 6 rbô nă cau jòi geh broă lơh den tàm hơ̆ geh rlau 1 rbô 830 nă cau jòi geh broă lơh pa, rlau 100 nă cau lòt lơh broă hờ lơgar ndai, geh 20% broă rơndap lơh, gơguh 10% pơndrờm mờ bal dùl tŭ nam lài.

Bal mờ hơ̆, Gah Lao động Thương binh mờ Xã hội bơyai lơh ală broă lơh pơlam, yal tơnggit jòi broă lơh, lam lơh dong kờl bơsram broă lơh gơ jat bal mờ lam lơh geh cồng nha broă lơh dong kờl, bơto pơlam, bơto bơtê broă lơh tàm ƀòn lơgar tơn bơh ală broă lơh tam sơngka sền gàr kơphe, tam biap bơkàu ngui công nghệ cao, ròng phan, bơyai lơh bơto broă lơh ờ di lơh sa suơn sre bè: cơ khí, lơh niam ồs đèng phan ngui tàm hìu bơnhă, lơh broă tàm hìu bơnhă, phan trah mòn, mai, tàñ phan, bơt bơtàu... Do là ală broă lơh dipal geh ală kong ti, mpồl lơh sa tàm càr geh jơnau kờñ rơ wah, pơgồp bơnah gàr broă rơndap lơh ai geh broă lơhbơh 13 rbô tus 15 rbô nă cau in tàm nam 2021 bơh càr Lâm Đồng dê.

Cau mblàng K’Duẩn