VOV4.K’ho- UBND càr Lâm Đồng pa geh sră nggal jal mhar sồr ơm ing broă tă priă drơng broă tàm ală trạm BOT tàm ù tiah càr dê nàng dong kờl broă lơh rcang sơndră kòp Covid-19. Jat hơ̆, UBND càr Lâm Đồng sồr Công ty TNHH Hùng Phát ơm ing tă priă drơng broă ngui gùng ù gờl tàm trạm BOT Định An, kơnhoàl Đức Trọng kờp bơh 12 jiơ klo ngai ngai 22/7 tus 0 jiơ mang ngai 1/8 tus do. Tơngai ơm ing tă priă geh bơtơl wơl tàm tơngai tă priă bơh Rơndap broă lơh gùng rơndeh ntoat rat Liêng Khàng- jơng koèl kơh Preen.

Bal mờ hơ̆, nàng kờñ dong kờl làng bol tàm ù tiah càr Lâm Đồng tàm broă lòt rê, lơh sa, kă bro, ai tơl bơta ƀuơn dong kờl di tŭ ală phan bơna lơh geh bơh lơh sa suơn sre ai ală tiah gam lơh jat broă ai ơm yah ngài mpồl bơtiàn jat Chỉ thị sồ 16 bơh Thủ tướng Chính phủ dê, ngan là tàm ƀòn dờng Hồ Chí Minh, UBND càr Lâm Đồng sồr Tổng cục Gùng ù gờl Việt Nam sền sơwì sồr cau bơcri priă bơh trạm tă priă BOT tàm xã Liên Đầm, kơnhoàl Di Linh lơh jat broă ơm ing tă priă bơh trạm dê.

Cau mblàng K’Hạnh