VOV4.K’ho- Drim ngai 20/10, tàm ƀòn dờng Dà Làc, Mpồl kuang bàng Quốc hội càr Lâm Đồng neh tus bal dơ̆ mut pơrjum dơ̆ 2, Quốc hội khóa 15 mờ broă lơh pờ tơn tàm internet. Bal mờ ală broă bal bơh gùt lơgar dê, ală kuang bàng Quốc hội càr Lâm Đồng neh rơcang lài nàng pơyua jơnau đơs, jơnau dan bơh cau tĕ khà tàm càr dê bè ală broă gơlik geh, ală bơta ờ niam kờñ geh Quốc hội, Chính phủ sền gròi, cribơyai broă lơh nàng di tŭ tam gơl mờ bơsong tàm tơngai tus.

Ồng Nguyễn Tạo, Phó Kuang atbồ Mpồl kuang bàng Quốc hội càr Lâm Đồng pà git, kòp Covid-19 neh gơ rềng uă ngan tus 2 gah lơh sa tờm bơh càr dê là lơh sa suơn sre mờ nhơl chờ. Tàm hơ̆, bơta bơtàu tơnguh wơl broă lơh sa, gàr kơ̆ kơljap anih tac ai ală bơta phan lơh gơs bơh suơn sre in, ngan là ală bơta phan biap, bơkàu gam geh gah lơh sa suơn sre càr hời rơ hời bơsong, lam lơh sa, rơndap tap sèng khà phan bơna bè lơi gơ in dipal, drơng jơnau kờñ drà kă bro tàm bơta bè ờs pa.

Cau mblàng K’Duẩn