VOV4.K’ho- Mpồl đơng lam lùp kờp lơh sa càr Lâm Đồng neh bơyai lơh pơrjum lam lơh broă lơh lùp kờp lơh sa mờ lùp kờp anih lơh broă hành chính nam 2021. Jat jơnau yal bơh Cục Thống kê càr dê, kờp tus jơh nhai 4 nam 2021, gùt càr neh lam lơh lùp kờp 2 rbô 158 tàm khà 8 rbô 659 mpồl lơh sa kă bro, geh 33%. Gơwèt mờ khối hành chính lơh broă gùt càr neh lùp kờp 519 tàm 519 mpồl lơh broă hành chính, geh 100%. Sền bal broă lơh lùp kờp tàm ală gah tàm tơngai lài ndrờm gàr bơta niam, jơnau tơnggit khà kờp wil tơl mờ broă lùp kờp geh lơh di jat jơnau sồr.

Mơya bơdìh hơ̆ tai, kung gam 2, 3 bơta ờ niam bè tơngai lam lơh broă lùp kờp tàm ờ uă tiah gam lơyài, ờ uă sră lùp kờp gơ rềng tus mpồl lơh sa kă bro, broă lơh gam tìs bè kỹ thuật. Tơngai tus, Mpồl đơng lam lùp kờp geh pơn jat tai tơrgùm chồl mhar tơngai lam lơh broă lùp kờp, sồr jơh ală mpồl lam lơh broă yal tơnggit tơl làm, nàng kờñ lơh gơs niam dơ̆ lùp kờp lơh sa nam 2021 tàm càr Lâm Đồng.

Cau mblàng K’Duẩn