VOV4.K’ho- UBND càr Lâm Đồng bơyai lơh pơrjum sền wơl bơta lơh jat kơnòl broă lơh sa- mpồl bơtìan 4 nhai bồ nam 2020; lam lơh jat kơnòl broă, gùng dà broă lơh nhai 5 nam 2020.

Jat jơnau yal, broă rcang sơn dră kòp Covid-19 tàm ù tiah càr dê geh ală kấp, gah sơnah lơh broă rcang lài mut lơh, lam lơh jat geh cồng nha. Tàm tơngai lơh jat broă ơm yah tam cah is gùt mpồl bơtìan, ală gah sơnah lơh broă, ală kấp, ală tiah neh niam ngan lơh jat ală jơnau sồr bơh Chính phủ, Tỉnh uỷ, UBND càr dê.

Tàm tơngai tus, Phó Chủ tịch UBND càr Lâm Đồng ồng Nguyễn Văn Yên sồr mhar lam lơh geh cồng nha ală broă lơh jal mhar dong kờl, tă bơsong kal ke ai broă lơh sa kă bro in, sơlơ tơnguh ai càn priă bơcri dà lơgar, gàr tơl niam rài kis mpồl bơtìan, dong kờl làng bol gơtìp kal ke tài bơh kòp Covid-19. Tàm nhai 5, jơh bal ală gah, sơnah lơh broă, kơnhoàl pal kờp sền wơl broă rơndap lơh, rơndap ù tiah geh gơ rềng tus bơcri priă dà lơgar nàng tơr gùm yal mờ UBND càr mờ HĐND càr in, jat tàm rơnàng bơcri priă pal geh cồng nha; sền sơ wì wơl brê, geh rơndap broă lơh jàu kơnòl broă tam brê…

Cau mblàng K’ Hạnh