VOV4.K’ho- Kờp tus 9 jiơ drim ngai 23/5, càr Lâm Đồng neh geh rlau 281 rbô nă cau tĕ khà neh lòt tĕ khà, geh tus mờr 30% tàm kờp jơh khà cau tĕ khà tàm càr dê. Tơnơ̆ dơ̆ bơyai lơh pơrjum gờm chờ bồng bi sơnđờm mŭt lơh, jơh 1 rbô 110 anih đùh sră bơh càr Lâm Đồng dê neh dùl ròt đùh sră tĕ khà pồ kuang bàng Quốc hội khoá XV mờ kuang bàng Hội đồng Nhân dân ală kấp, tơngai lơh broă bơh nam 2021- 2026. Tơnơ̆ 2 jiơ đông hô, neh geh rlau 281 rbô nă cau tĕ khà lòt tĕ khà, geh tus mờr 30% kờp jơh khà cau tĕ khà tàm jơh gùt càr dê. Tàm ală anih đùh sră, broă tĕ khà geh lơh niam, rơndăp tăp sèng, ală cau tĕ khà ndrờm lơh jăt niam jơnau sồr 5K nàng sền gàr broă lơh rơcăng sơndră kòp Covid-19.

Cau tĕ khà là cau K’ho tềng hơđơm jơng bơnơm Lang Biang, thị trấn Lạc Dương, càr Lâm Đồng

Tàm anih đùh sră sồ 5, thị trấn Lạc Dương, kơnhoàl Lạc Dương, càr Lâm Đồng, cau tĕ khà là cau jơi bơtiàn kòn cau K’ho tàm tiah do neh jơh nùs ngan lòt đùh sră tơn tơnơ̆ tŭ jiơ bơyai lơh pơrjum sơnđờm mŭt lơh. Cau tĕ khà ồng Liêng Hót Ha Tuyên, 60 sơnam, ơm tàm ƀòn Đăng Gia Rít B, thị trấn Lạc Dương neh lơh sir gơnoar làng bol bơh he dê, chờ hờp đơs: Sền sră cih măt mờ he pal kơlôi sơnơng nền bè sră cih măt nàng gĭt nền là he geh pồ cau lơi in. Pin dờn cau lơi den he hơ̆ sồng pồ ih. Kơ̆p kờñ pồ geh cau geh tơl nùs nhơm niam, geh tơl bồ tơngoh jak nàng drơng broă ai làng bol in, pal tài bơh Đảng, tài bơh dà lơgar, tài bơh làng bol hơ̆ sồng di. Kơ̆p kờñ bơh añ dê là bè hơ̆.

Cau mblàng Lơ Mu K’Yến