VOV4.K’ho- Càr Lâm Đồng bơyai lơh pơrjum pờ tơlik tơn tàm internet tơn jơh broă lơh rơcang sơndră trồ tiah lơh aniai mờ jòi dong kờl rềs àr nam 2020 mờ lam lơh kơnòl broă nam 2021. Tàm nam 2020, bulah broă gơlik geh bơh trồ tiah lơh aniai ờ huan kơn jơ̆ mơya gùt càr gơtìp hoàc huơr rlau 100 tơmàn đông. Bơta trồ prang soat dà kung neh lơh gơbàn ờ tơl dà tus mờ mờr 1 rbô 300 lồ chi tam tàm ală tiah tàm càr. Nam 2020, càr Lâm Đồng neh hòi jà ală bơta tă pơgồp bơh kes priă, kes priă rơcang sơndră trồ tiah lơh aniai càr mờ priă dong kờl bơh dà lơgar nàng bơsong jơnau gơ lời wơl bơh trồ tiah lơh aniai. Mùl màl: Tă rlau 72 tơmàn đông nàng lơh niam wơl 13 broă lơh gơtìp hoàc huơr tài bơh trồ tiah lơh aniai; tă 6 tơmàn đông nàng dong kờl ală tiah bơsong hoàc huơr tài bơh trồ tiah lơh aniai. Tàm pơrjum, ală sở, gah broă lơh mờ ală tiah neh tơrgùm đơs tus ală bơta ờ niam kung bè ai tơlik ală broă lơh nàng kờñ lam lơh niam broă rơcang sơndră trồ tiah lơh aniai mờ jòi dong kờl rềs àr tàm nam 2021.

Cau mblàng K’Duẩn