VOV4.K’ho- Drim ngai 06/8, càr Lâm Đồng sền gŏ 4 nă cau bơtờp kòp Covid-19 geh sền gŏ tàm dùl tiah kòp là Công ty mai DWS - Công ty TNHH brài tàm xã Trạm Hành, ƀòn dờng Dà Làc.

Xét nghiệm làng bol tàm ù tiah xã Trạm Hành, ƀòn dờng Dà Làc

Lài hơ̆, drim ngai 05/8, Hìu sơnơm ƀòn dờng Dà Làc tus công ty do nàng ai mẫu test mhar ală công nhân in mờ sền gŏ 4 nă cau pin bơtờp kòp. Tơnơ̆ hơ̆, Anih tờm gròi sền kòp tê jê să càr Lâm Đồng ai mẫu xét nghiệm PCR kung pà gŏ cồng nha bơtờp mờ kòp Covid-19. Công ty TNHH brài Dà Làc geh rlau 200 nă công nhân, tŭ test mhar geh rlau 100 nă công nhân gam lơh broă. Tơnơ̆ tŭ sền gŏ geh cau bơtờp kòp Covid-19, mpồl lơh broă geh gơnoar neh sac rơwah mờ jun mờr 90 nă cau gơwèt cau F1 ai ơm yah ngài tơrgùm bal, mơkung lam lơh broă lơh jòi gĭt tiah lòt rê ală cau geh gơrềng ndai. Broă lơh jòi gĭt tiah lòt rê, cang tiah nàng kơryan kòp gam geh ală mpồl lơh broă geh gơnoar càr Lâm Đồng dê lơh ngan lam lơh.

Cau mblàng K’Hạnh