VOV4.K’ho- Drim ngai 26/3, Hội đồng Nhân dân càr Lâm Đồng khóa 11 neh mut pơrjum dơ̆ 18 nàng sền sơ wì ring bal ală nghị quyết kuơmàng bè bơtàu tơnguh lơh sa mpồl bơtiàn bơh càr dê.

Tàm pơrjum, ală kuang bàng sền sơ wì, cribơyai mờ ring bal jơnau rơcang cih ală nghị quyết kuơmàng bè bơcri priă dà lơgar, bè: Nghị quyết ring bal gùng dà bơcri priă, tam gơl gùng dà bơcri priă ală rơndap broă bơcri priă dà lơgar; tam gơl, bơtơl broă rơndap lơh bơcri priă dà lơgar bơh kes priă càr nam 2021 mờ broă rơndap lơh bơcri priă dà lơgar bơtơl geh jơnau kờñ bơh kes priă dà lơgar dê nam 2021.

Kuơmàng, pơrjum dơ̆ do gam sền sơ wì sră yal ai tơlik Nghị quyết bơh rơndap broă bơcri priă rơndap broă lơh gùng ù gờl ntoat jờl Tân Phú (càr Đồng Nai)- Bảo Lộc (càr Lâm Đồng) jòng 67 kơi sồ jat broă lơh lơh bal đah dà lơgar mờ cau dùl nă să is. Tŭ rơndap broă lơh gùng rơndeh ntoat jờl do lơh gơs geh hời rơhời lơh gơs ală gùng ù gờl rơndeh ntoat jờl Dầu Giây- Dà Làc jat broă rơndap ù tiah lài neh geh Thủ tướng Chính phủ ring bal, lơh gơlik bơta pràn bơtàu tơnguh lơh sa mpồl bơtiàn, sền gàr lơngap lơngai, sền gàr dà lơgar bơh ală càr gơ wèt tiah Tây Nguyên dê.

Cau mblàng K’Duẩn