VOV4.K’ho- Drim ngai 08/12, pơrjum dơ̆ 4, Hội đồng Nhân dân càr Lâm Đồng khoă X tơngai lơh broă bơh nam 2021- 2026 neh geh lơh. Tàm dơ̆ lùp mờ hơ jơnau lùp, ală broă gơrềng tus ală bơta gam gơkòl, ờ hềt pràn jak tàm broă ătbồ dà lơgar bè brê, ù tiah, rơndăp tă sèng bơ̆t bơtàu, phan kuơ geh is tiah ơm kis...kuang bàng Hội đồng Nhân dân càr Lâm Đồng neh sền gròi ngan tus broă tam pà bă, tăc bơnàng ù mờ lơh gơs ală rơndăp broă lơh ƀòn làng bol ơm kis “ờ ngan” gơbàn tàm kơnhoàl Ƀảo Lâm mờ ƀòn dờng Ƀảo Lộc.

Jơnau pal đơs là jơnau geh ngan do neh gơlik geh tàm tŭ tơngai jŏ jòng mơya tus tŭ do kung gam ờ hềt geh càr bơsong jơh sơl. Mblàng yal loh tàm dơ̆ lùp, ồng Trần Văn Hiệp- Củ tịch Ủy ƀan Nhân dân càr Lâm Đồng đơs nền, càr neh ai lơh jăt uă ngan sră nggal sồr ală mpồl lơh broă geh gơrềng tus lùp khàu, bơsong mơya broă gơlik geh kung gam ờ hềt geh tam gơl sơl. Ờ gŏ di bè hơ̆ lơm, tŭ do broă tam pà bă, tam cah ù, tăc bơnàng ù lơh hìu bơh broă lơh ală rơndăp broă lơh “ờ ngan” gam pơn jăt tai gơrề uă tus bàr pe ƀòn lơgar ndai.

Cau mblàng Lơ Mu K’Yến