VOV4.K’ho- Mờ bơta pràn dơng 3 tơlak 200 rbô khối dà, drơng jơnau kờñ bồm dà ai 600 lồ phan tam in, tơnau rbòng dà Proh gơwèt xã Proh, kơnhoàl Đơn Dương, càr Lâm Đồng gam ơm tềng đap jơnau pơhìn gơtìp ờ kơ̆ tàm kàl mìu nhàc tài gơtìp aniai kơn jơ̆ ngan.

Tơnau rbòng dà Proh, xã Proh, kơnhoàl Đơn Dương, càr Lâm Đồng gam gơtìp ờ diơng tài bơh gơtìp sơgràm aniai kơn jơ̆ ngan. Gơl gùng lòt hơđang bơtơt dơng dà neh gơtìp bơcah, lơh gơlik ală rbòng dà jrô tài uă rơndeh kong goa kơn jơ̆ khat gơboh pơndiang bràs, ù. Bal mờ hơ̆, bơta gơ bồr ù, tuh ù gơgràm tơnau dơng dà kung gơlik geh tàm uă tiah lơh gùng ờdo ờdă bơh tơnau dơng dà dê gơtìp pơhìn. Jơh ală broă lơh gơ rềng do neh gơlik geh tàm tơngai jŏ jòng, mơya gơnoar atbồ tiah do mờ anih lơh broă geh gơnoar kung gam ờ hềt geh broă lơh jơh nùs nàng bơsong, geh tŭ là mìng bơsong dùl êt, cèng bơta tam dră gời.

                                     Làng bol tràl sơbil cèng măi cò tơnrung, sơgràm tiah ờdo ờdă bơtơt dơng dà Proh

Ồng Đỗ Phú Hoà, kuang bàng Anih atbồ, ngui rbòng dà Đơn Dương, là cau atbồ tơn tơnau rbòng dà Proh pà git, pah tŭ git gŏ geh cau sơ gràm aniai tơnau dơng dà den mpồl ndrờm lơh sră mờ sồr gơnoar atbồ xã bơsong. Bulah bè hơ̆, uă ngan broă gơlik geh ndrờm lời jŏ jòng, bơsong ờ tus gùng tus dà lơh bơta sơ gràm aniai tơnau rbòng dà Proh ngai sơlơ ờ gơtùi sền gròi tai. Ồng Hòa yal, tŭ do neh geh rlau 35 hìu bơnhă làng bol sơgràm ù gơwèt gùng ờdo ờdă sền gàr rbòng dà do: “Đơs bal tàm broă atbồ rbòng dà, ală broă gơlik geh gơ rềng den geh uă ngan bơta. Dilah geh broă sơgràm aniai gơlik geh mờ bol he ờ kràñ cê lơh glài den geh gơbàn jŏ jòng mờ ngai sơlơ kal ke rlau. Tŭ do, ù tiah ngai sơlơ kas priă, ală broă lơh tìs sùm gơlik geh. Dilah ờ kràñ cê lơh glài dùl bă nền nòn ngan rlau jơh den broă do pơn jat tai gơlik geh sùm, lơh gơbàn kal ke ai broă atbồ mờ sền gàr broă lơh in”.

Mùl gŏ ngan ai broă lơh glài ờ tus gùng tus dà, ờ geh bơta kràñ cê bơh gơnoar atbồ xã Proh dê là broă sơgràm tơnau dơng dà rbòng dà Proh gơlik geh tàm ngai 11/4 pa do. Tŭ git gŏ ồng Nguyễn Xuân Hải ơm tàm thị trấn Thạnh Mỹ, kơnhoàl Đơn Dương tràl sơbil cèng măi chŏ ù mut nàng cò tơnring, sơgràm ù tàm bơnah ù bơh tơnau dơng dà dê, Trạm atbồ- ngui rbòng dà Đơn Dương neh kơryan, sồr Ủy ban Nhân dân xã Proh cih sră mờ lơh glài broă lơh tìs. Bulah bè hơ̆ tus tŭ do, bơdìh mờ tong priă lơh glài 200 rbô đông, cau lơh tìs kung ờ hềt lam lơh broă bơsong jơnau gơ lời wơl, dờp wơl bơta bè ờs ai bă ù sơgràm aniai in. Đơs bè bơta lơyài do, ồng Châu Văn Kỳ, Chủ tịch Ủy ban Nhân dân xã Proh đơs nền ờ geh bơta mpồn, dong kờl halà ờ sền gròi nàng broă lơh tìs gơlik geh jŏ jòng, Tài ồng pa at gơnoar broă 2 nhai do den tàng tơl broă ờ hềt quèng. Ồng pà git, geh mhar lơh glài tus gùng tus dà broă lơh tìs tàm tơngai tus: “Kơnờm geh tơnau dơng dà do hơ̆ sồng geh dà ƀồm bơh tiah do lòt tus xã đah ne den tàng he sền dờng màng ngan, mơya bơta kal ke ngan rlau jơh tŭ do là lơh bè lơi nàng git gŏ mờ lơh glài bơh sơn rờp tơn, tài cau do sơgràm ù den cau ndai kung gơtùi lơh bè hơ̆ sơl. Den tàng broă lơh pơn jat tai, dilah ồng do gam pơn jat tai lơh tìs den pal lơh glài kràñ”.

Tềng đap bơta tơnau rbòng dà Proh gơtìp sơgràm aniai kơn jơ̆, Trạm atbồ- ngui rbòng dà Đơn Dương neh uă dơ̆ geh sră nggal dan ală anih lơh broă geh gơnoar dong kờl kơryan ală rơndeh rơndồ dờng lòt rê tàm mat ù tơnau dơng dà. Mờ kung sồr gơnoar atbồ tiah do lơh glàikràñ ală broă lơh tìs tơnau dơng dà, sơgràm tiah ờdo ờdă. Tài dilah lời bơta do pơn jat tai gơlik geh den lơh gơ rềng uă ngan tus broă ngui mờ pơhìn lơh gơbàn ờ kơ̆ tơnau dơng tàm kàl mìu tus.

Cau mblàng K’Duẩn