VOV4.K’ho- Mờ bơta kơp kờñ dong làng bol tàm tiah gơtìp tam cah is, wàng se tơrmù ƀà kal ke, làng bol ală jơi bơtiàn kòn cau tàm càr Dak Nông neh khòm tơrgùm git nđờ rhiang tấn phan bơh suơn sre ală bơta nàng pơyua tus ƀòn dờng Hồ Chí Minh mờ ală càr tiah đah jum dà lơgar in pơgồp bơnah rơcang sơndră kòp Covid-19.

Bi K’Tư, ơm tàm tiah ngài ƀòn Sê Rê A, xã Dak Som, kơnhoàl Dak Glong, càr Dak nông, ờ mìng dong kờl jơh khà prìt hìu bơnhă dê mờ gam jòi tai uă bơta biap brê bơkah bơh tiah do dê nàng pơyua pà làng bol ală càr tiah đah jum dà lơgar gam gơtìp wàng se tài bơh kòp bơtờp in. Bi K’Tư pà git: “Añ neh pơyua 2 tạ prìt mờ ală bơta bipơ bè biap bùm lô, biap nse. Tàm do geh ală bơta biap hơ̆ den tàng hìu bơnhă añ neh mut tàm brê jòi nàng pơyua làng bol ƀòn dờng in. Tơngai tus, añ kung bè hìu bơnhă geh pơn jat tai dong kờl bơ, ƀang. Tŭ do neh tus nhai ƀang den tàng geh bal ƀang brê mờ ƀang tam, hìu bơnhă añ pơn jat tai geh ală broă lơh dềt nàng pơyua làng bol ƀòn dờng in”.

Ală bơta biap, kơnuh, plai chi làng bol rơcang pơyua ală càr tiah đah jum dà lơgar in

Ndrờm bè hơ̆ sơl, tàm tiah nhàr dà lơgar thôn Thuận Hải, xã Thuận Hạnh, kơnhoàl Dak Glong, hìu bơnhă bi Trịnh Văn Khởi neh dong kờl rlau 2 tấn biap, plai chi geh blơn ồs, bắp sú, prìt, bơ tus làng bol tiah gơbàn kòp in. Bi gam hòi jà làng bol tàm thôn phan dùl êt mơya nùs nhơm uă, tơl nă cau tă pơgồp dùl êt phan bơh suơn sre lơh gơlik is mờ bơta kơp kờñ dong làng bol tiah gơbàn kòp sơrlèt gan kal ke: “Hìu bơnhă geh dùl êt biap, kơnuh, plai chi bè blơn ồs, rơpual kuh, rơpual, prìt, bơ den kung neh dong kờl jơh bloh. Tàm nđờ ngai do sền gŏ broă gơlik geh bơh kòp dê kal ke ngan, 2 nă ùr bơklau añ tàm đơs is là lời dùl êt tŭ tơngai hòi jà làng bol gam geh phan bơna tam pà dùl êt mờ làng bol tiah gơbàn kòp. Ngai do añ bal mờ nđờ nă oh mi kung tă pơgồp prìt, pơl hong, biap súp lơ geh mờr 4 tấn nàng rơcang ai dơ̆ pơndiang mang do in tus dong làng bol tàm ƀòn dờng Hồ Chí Minh mờ Bình Dương”.

Làng bol kơnhoàl tiah nhàr dà lơgar Tuy Đức pơndiang phan bơh suơn sre tus làng bol tiah gơbàn kòp in

Tàm xã Dak Buk So, kơnhoàl tiah nhàr dà lơgar Tuy Đức, càr Dak Nông làng bol kung tă pơgồp, hòi jà dong kờl geh rlau 30 tấn phan bơh suơn sre pơyua tus làng bol tiah gơbàn kòp in. Ồng Nguyễn Văn Anh, Bí thư Đảng ủy, Chủ tịch Ủy ban Nhân dân xã Dak Buk So pà git: “Xã là tiah nhàr dà lơgar, rài kis làng bol gam uă kal ke. Mơya tŭ ală kấp, ală gah broă lơh, kấp ủy gơnoar atbồ xã hòi jà tă pơgồp ală bơta phan pal geh pah ngai nàng tam pà kal ke mờ tiah gơbàn kòp den làng bol dùl nùs lơm. Geh cau gam pơndiang tơn ală bơta phan biap, kơnuh, plai đo tus hờ Ủy ban Nhân dân xã, geh ală cau ai ală mpồl ơruh pơnu, cau ùr, cau lơh broă sa mut tơn tàm suơn nàng pic, tam pà bal kal ke”.

Bulah Tây Nguyên kung gam pal kong mờ kòp Covid-19 gơlik geh kal ke, mơya mờ bơta jơh nùs, dùl pet tŭ jơgloh ndrờm mờ dùl kơldung tŭ hờm, làng bol ală jơi bơtiàn kòn cau tiah do tŭ lơi kung kờñ tam pà bal mờ ală phan bơna lơh gơlik is dong làng bol tàm ƀòn dờng Hồ Chí Minh gam pal ơm yah ngài mpồl bơtiàn sơrlèt gan kòp dờng.

Cau mblàng K’Duẩn