VOV4.K’ho - Jăt Ƀan tôn giáo càr Dăk Nông pà git, tàm càr Dăk Nông tŭ do geh di pơgăp 160 rơbô 420 nă cau jăt yàng; 70 nă cau kơ đơng yàng; 77 hìu yàng. Ală nam do, làng bol jăt yàng bàp tàm càr Dăk Nông neh tă pơgồp di pơgăp 28 tơmàn 864 tơlăk đong priă ngan mờ git nđờ rơbô ngai lơh broă bal mờ gơnoar atbồ lơh gùng lòt tàm ƀòn.

                                Gùng mŭt tàm ƀòn Bu Bir geh uă làng bol tă priă nàng lơh

Tŭ do, gùt càr geh 29 tàm 60 xã geh dờp geh khà ƀòn lơgar pa. Nàng geh cồng nha do là kơnờm bơta lơh broă bal bơh jơh gùt mpồl cíñ trị mờ gùt mpồl bơtiàn dê, tàm hơ̆ geh broă pơgồp uă ngan bơh ală cau kơđơng yàng, cau jat yàng Bàp. Ồng Điểu Khuyên, kòn cau Mnông, atbồ ƀòn Bu Bir, xã Quảng Tín, kơnhoàl Dăk Rlâp, càr Dăk Nông pà git, ƀòn gam lơh ngan nam pa tơl khà thôn ƀòn lơgar pa gơguh jơnhua. Ală ngai do, làng bol gam chờ hờp wă rò ngai Noel mơya kung gam rơcang ngac mờ kòp Kovid-19 sơl: “Đơs ngan, dilah ờ geh kòp bơtờp den làng bol chờ hờp ngan tus ală ngai chờ, ngai sa tềp, ngai Noel lơh jat bơhiàn yau Mnông he dê. Jơh Noel den tus sa tềp. Tŭ do, kòp bơtờp gam gơlik geh kal ke, chờ hờp den geh chờ hờp mơya bơyai lơh is tàm tơl hìu bơnhă, ờ geh tơrgùm gal cau tai”.

Cau mblàng Ndong Brawl