VOV4.K’ho - Rơlao 5 nam do, kơnhoàl Kon Rẫy, càr Kon Tum neh jào rơlao 12 rơbô lồ brê hòn is ai mờr 900 ƀòn làng bol kòn cau in atbồ, sền gàr. Git nđờ rơbô hìu tus bal gàr brê geh dờp broă tơm priă sền gàr tiah kis brê, tơnguh tai priă geh tàm rài kis. Mờ sơgràm aniai brê tàm kơnhoàl do gơmù jăt nam, bă ù brê sùm geh gàr kơl jăp.

Là dùl tàm ală hìu kis tàm ƀòn 1, xã Đăk Kôi, kơnhoàl Kon Rẫy dờp sền gàr brê bơh bồ nam 2017, ồng A Đoàn yal, pah poh ồng bal mờ mpồl atbồ sền gàrr brê tàm ƀòn lòt sền gròi bơh 2 tus 3 dơ̆ nàng sền gàr brê gơwèt bă brê 467-Lâm trường Đăk Ruồng. Broă lòt sền gròi sùm neh lơh gơmù ngan broă mus kơl chi brê kơñao, khà dơ̆ sơgràm ù brê kung ờ gam gơtìp. “Bol añ jăt mpồl ala bal sền gàr cau rê ha là cau ơm gàr. Tŭ mpồl 1 jơh tơngai den mpồl 2 ơm ala bal. Tơl mpồl geh ai bơh 3 tus 4 nă cau ơm gàr nàng gàr sền brê 2 ngai hơ̆ sồng ala cau ndai. Gàr bè hơ̆ tŭ do ờ geh cau mus kơl aniai brê tai”.

Kung geh dờp bơta kuơ bơh broă tơm priă sền gàr tiah kis brê, ồng A Dĩnh, kis tàm ƀòn 1, xã Đăk Kôi, kơnhoàl Kon Rẫy pà git: “Bè broă atbồ sền gàr brê den ƀòn geh 4 mpồl, tơl mpồl geh 4 nă cau, mờ kờp jơh là 16 nă cau. Mpồl lơh rơndăp broă lòt sền gròi, sền gàr 4 dơ̆ tàm 1 nhai. Lài ngan he lòt sền gròi nàng kơrian broă mus kơl brê brê; tơnơ̆ mờ hơ̆ là sơgràm ù brê, tŭ gŏ den yal mờ gơnoar atbồ xã in nàng tus kơrian. Tŭ dờp priă bơh broă sền gàr tiah kis brê, làng bol geh ngui nàng tơnguh rài kis broă lơh sa. Bè hìu añ, dờp geh priă neh blơi sur nàng ròng ting tàm suơn mờ priă geh rơlao 100 tơlăk đong tàm 1 nam”.

Ƀòn 1, xã Đăk Kôi, kơnhoàl Kon Rẫy tŭ do geh 54 hìu dờp sền gàr mờr 1 rơbô 600 lồ brê. Ală hìu geh tam pà gơs 12 mpồl, pơdar bal lơh jăt broă lòt sền gròi sền gàr brê. Ồng A Chiếu, Atbồ mpồl sền gàr brê sồ 1, xã Đăk Kôi pà git, broă dờp sền gàr brê neh dong kờl tơl hìu geh tai priă pah nam bơh 8 tus 10 tơlăk đong bơh broă sền gàr tiah kis brê. Khà priă do ală hìu bơcri tàm broă blơi phơng sih, tờm sơntìl, phan ròng nàng tơnguh bơtàu broă lơh sa. Mìng is hìu nhă ồng A Chiếu neh ròng geh 4 nơm kơnrồ, geh di pơgăp 100 tơlăk đong... “Công ty jào hìu nhă añ in brê, añ atbồ sền gàr brê mờ geh dờp priă tơm broă sền gàr tiah kis brê... Bè nam do ală hìu dờp geh 132 tơlăk đong, tam pà tơl hìu geh 2 tơlăk 800 rơbô đong. Làng bol ai priă do blơi kơnrồ, sur nàng ròng, blơi phơng nàng sền gàr phan tam tàm suơn, tàm sre, mìng is hìu añ blơi geh 4 nơm kơnrồ. Làng bol, bol añ ưn ngài công ty. Bol añ sùm lơh ngan pơgồp bal nàng pah poh, pah nhai lòt sền gròi brê. Tŭ do bol añ gam ai geh cau sền gàr tàm brê, geh jơnau lơi gơtìp den di tŭ yal tus anih sền gàr brê in mơ”.

Gùt kơnhoàl Kon Rẫy tŭ do geh mờr 900 mpồl làng bol dờp sền gàr di pơgăp 12 rơbô lồ brê. Đơs bè cồng nha bơh broă sền gàr brê mờ ngui priă tơm bơh broă sền gàr tiah kis brê bơh ală mpồl làng bol dê, ồng Nguyễn Văn Chính, Phó Kuang atbồ Lâm trường Đăk Ruồng đơs: “Bơh ngai geh broă ai jào sền gàr brê làng bol in tus tŭ do den làng bol git mờ geh kơnòl rơlao tàm broă sền gàr brê. Làng bol geh pơgồp bal bơta kuơ broă lơh sa tài pah nam geh tai priă nàng làng bol tơnguh broă lơh sa bè: blơi phơng sih, blơi sơntìl phan ròng nàng tơnguh bơtàu broă lơh sa, tơnguh rài kis tàm ƀòn lơgar”.

Mùl màl pà gŏ, broă tơm priă sền gàr tiah kis brê tàm kơnhoàl Kon Rẫy, càr Kon Tum neh ai geh “bơta kuơ dơ̆ lĕ bal” tŭ làng bol geh tai priă tàm rài kis nàng tơnguh broă lơh sa, mờ pơgồp bal tàm broă sền gàr brê geh cồng nha. Ồng Nguyễn Tấn Phát, Kuang atbồ mpồl sền gàr brê kơnhoàl Kon Rẫy, càr Kon Tum pà git: “Gơwèt mờ broă sền gàr tiah kis brê neh geh gơrềng niam uă ngan tus mờ rài kis làng bol kis rềp jăt gah brê, tàm hơ̆ uă ngan là làng bol kòn cau. Broă lơh do neh pơgồp bal tàm broă tơnguh tai priă geh, lơh ring niam rài kis làng bol tàm broă lơh ngan tơn jơh jơgloh tơmù rơƀah. Hŏ là bơta gơrềng bè đah mpồl bơtiàn. Dùl bơnah tai tŭ làng bol geh dờp bơta kuơ bơh broă sền gàr tiah kis brê, den làng bol tơnguh uă jơnau git wă nàng sền gàr bă brê tŭ do geh. Làng bol sùm bơyai lòt sền gròi tàm bơnah bă brê geh jào atbồ, bơh tŭ hơ̆ pơgồp bal tàm broă gàr geh bă brê mờ tơmù geh broă mus kơl chi brê lơh mìr kung bè ală dơ̆ kơl chi brê ờ di mờ adăt boh lam”.

Cau mblàng Ndong Brawl