VOV4.K’ho- Bè bol añ neh yal, tơnơ̆ 12 nam lam lơh rơndap broă lơh bơtơ̆t dơng dà 4 rơbô 400 tơmàn đong Krông Pách Thượng, tus nhai 3 pa do, làng bol tiah tàm dơlam tơnau dà neh sơnđờm ntrờn tus tiah ơm kis pa. Mờ rlau 700 hìu bơnhă, pơgap 4 rơbô nă cau kờñ geh ntrờñ, bơnah broă lơh rơndap ai làng bol in tàm tiah ơm kis pa là uă ngan. Bơh sơnrờp ală mpồl lơh broă geh gơnoar tiah do dê dờp ală broă dong kờl làng bol. Mơya, tài bơh kòp Covid-19 gơlik geh kal ke, ală mpồl lơh broă pal lơh lài broă lơh rcang sơndră kòp. Tŭ do, làng bol neh lơh jat nùs nhơm tam klăc bal, cau tus lài dong kờl cau tus bơh ngkời tus dong kờl bơt hìu ơm, bè ờs wơl rài kis.

Hìu bơnhă mò Ma Thị Sìn, ơm tàm thôn 9, xã Cư San, kơnhoàl M’Drak ntrờn tus tiah ơm kis pa sồ 1 rơndap broă lơh tiah tàm dơlam tơnau dà Krông Pách Thượng, xã Cư Elang, kơnhoàl Ea Kar tàm tơngai bơta kòp Covid-19 gơlik geh kal ke tàm jơh bal 2 kơnhoàl lòt mờ tus. Ală mpồl lơh broă geh gơnoar lài do dờp kơnòl broă dong kờl làng bol trờn tus tiah ơm kis pa ndrờm neh tơrgùm bal tàm broă lơh rcang sơndră kòp lơm. Mơya, bơtoah ngan, ală hìu bơnhă ơm kis pa lài do, bơh jŏ là dùl thôn, dùl xã bal, là ƀòn lơgar rềp bal, cau pròc mhàm, cau neh kuèng bal neh bal mờ gơ̆p dong hìu bơnhă mò dê bơt hìu ơm.  Kơnờm bơh hơ̆, mìng tơnơ̆ pơgap 1 poh, hìu neh bơt jơh, hìu bơnhă mò dê neh bè ờs wơl rài kis tàm tiah ơm kis pa do. Mò Ma Thị Sìn đơs:

Tàm ƀòn, làng bol dong kờl añ lơh hìu, hơ̆ sồng tìm rơkàng hìu, tui àñ, yờ guh sùm. Làng bol tàm do gam sền gròi  bal ai he in bè hơ̆ la niam ngan bloh.

Làng bol tiah ơm kis pa rơndap broă lơh bơtơ̆t dơng dà Krông Pách Thượng dong kờl bal mờ gơ̆p lơh hìu ơm tàm tơngai kòp Covid-19 gơlik geh kal ke tàm Dăk Lăk

Ồng Vàng Seo Pao, Phó Kuang atbồ ing thôn ơm kis pa sồ 1, xã Cư Elang pà gĭt, gĭt loh broă lơh rcang sơndră kòp tŭ do là kuơ màng ngan, tàm tŭ ală mpồl lơh broă geh gơnoar ờ ru ngan tàm broă sơndră kòp, làng bol jòi broă tàm dong kờl bal mờ gơ̆p. Mờ pơgap 130 hìu bơnhă neh trờn tus tiah ơm kis pa, tơl hìu bơnhă ai dùl, bàr nă cau mờ thôn crơng gơs 9 mpồl. Ală mpồl do tàm pơdar bal mờ gơ̆p dong kờl ală hìu bơnhă pa tus bơt hìu, bè ờs wơl rài kis. Ồng Vàng Seo Pao đơs:

Kung crơng gơs geh 9 mpồl tui àñ, bơt hìu sơl. Ală hìu bơnhă tus bơh ngkời den kơnòm oh mì, ƀòn lơgar bal tus bal lơh hìu den ờ geh bơta lơi kal ke ờ. Bơt hìu ơm den ngai kung geh bơh 30 tus 40 nă cau, kung lơh jơh sơl, tìm rơkàng hìu jơh tàm ngai lơm, ai broă lơh ndai den cau tờm hìu rcang lơh is. Pơn yơu bè ngai hìng geh hìu bơnhă Lý Seo Cháo tus den bi Đông neh yal mờ mpồl cau atbồ bloh. Cau atbồ mpồl kung neh yal ai ală cau tàm mpồl in tus bal dong kờl sơl.

Làng bol tiah ơm kis pa rơndap broă lơh bơtơ̆t dơng dà Krông Pách Thượng dong kờl bal mờ gơ̆p lơh hìu ơm tàm tơngai kòp Covid-19 gơlik geh kal ke tàm Dăk Lăk

Ồng Trần Văn Đông, Phó Kuang atbồ Phòng Nông nghiệp mờ Phát triển Nông thôn kơnhoàl Ea Kar, anih lơh broă sùm wă rò làng tus bal tiah ơm kis pa rơndap broă lơh bơtơ̆t dơng dà Krông Pách Thượng pà gĭt, broă làng bol dong bal mờ gơ̆p neh tă bơsong bơta kal ke ai kơnhoàl in tàm tơngai kòp gơlik geh kal ke, ờ gơtùi ai mpồl tus dong kờl làng bol. Tềng đap mat, kơnhoàl neh dong kờl ală mpồl lơh hìu in priă jền blơi dà hùc, phan bơna kờñ pal geh, chèu glòm muh mat nàng rcang sơndră kòp. Mơya mờ khà hìu bơnhă tus tiah ơm kis pa uă ngan, pơgap 230 hìu bơnhă tàm tiah ơm kis pa sồ 1 mờ mờr 500 hìu bơnhă làng bol tàm tiah ơm kis pa sồ 2, tàm tŭ kòp gam jŏ jòng, UBND kơnhoàl mờ Mpồl atbồ rơndap broă lơh bơh càr dê gam pơgồp bal, ai gùng dà broă lơh dong kờl priă jền tơm priă cau lơh broă ai ală mpồl lơh hìu in. Bơta do geh gàr niam dà kơl hề bơh làng bòl dê kung bè pơn dờm pơn điang làng bol nàng broă lơh tiah ơm kis pa lơh geh jơnau kờñ neh geh ai tàm tơngai kòp bè tŭ do. Ồng Trần Văn Đông đơs:

Priă jền dong kờl den tŭ do gùng dà broă lơh Mpồl atbồ rơndap broă lơh càr dê gam bơt bơtàu, kơnhoàl geh bơyai lơh pơrjum nàng lùp sền wơl tơngum bè khà priă do dê. Tơnơ̆ hơ̆, dilah geh kĭ ring bal den bol añ geh ngui khà priă do tă tơm ai ală hìu bơnhă làng bol tus bal dong kờl ai ală hìu bơnhă pa tus tàm tiah ơm kis pa in là 200 rơbô đong dùl ngai lơh broă.

Tàm tơngai kòp gơlik geh kal ke, broă lơh tiah ơm kis pa bơtơ̆t dơng dà Krông Pách Thượng gơtìp bàr pe bơta kal ke. Mờ nùs nhơm tam klăc bal, làng bol tàm do gam dong kờl bal mờ gơ̆p nàng broă lơh tiah ơm kis pa lơh geh jơnau kờñ neh geh ai là gờñ bè ờs wơl rài kis ai ală hìu bơnhă làng bol in.

Cau cih Công Bắc- Cau mblàng K’Hạnh