VOV4.K’ho- Nam 2021 là nam bềng kal ke mờ ală jơnau gơ lời wơl bơh kòp Kovid-19 dê gam mờr lòt gan, mơya gơ wèt mờ cau ling mờ làng bol tiah geh kòp, hơ̆ là dùl nam bềng lìu nùs nhơm đah ling klàng làng bol, nùs nhơm đah cau ling bal, cau lơh broă bal.

Mìng tàm 2, 3 jơ bơh tŭ geh jơnau sồr, dùl hìu sơnơm ing kòp bơ tờp neh geh lơh, dùl anih tờm xét nghiệm ing neh geh lơh gơs; ờ hềt tus 48 jơ, dùl dơ̆ ai ling lòt lơh kơnòl broă jal mhar geh lam lơh mờ măi mok, phan bơna pa bal mờ cau lơh broă bơh Hà Nội sơrlèt gan git nđờ rbô kơi sồ mut tàm ƀòn dờng Hồ Chí Minh mờ ală càr tiah đah jum dà lơgar dong ală tiah rơcang sơndră kòp. Hơ̆ kung là ală dơ̆ ai ling lòt lơh kơ nòl broă jal mhar tàm rài ring lơngai bơh cau ling wa Hồ dê tềng đap bol sò tơm là kòp Kovid-19. Thượng tướng Võ Minh Lương, Thứ trưởng Ƀộ Quôk phòng pà git: “Tềng đap bơta hơ̆, Ƀộ Quôk phòng tŭ hơ̆ neh ai ngui 9 hìu sơnơm ing bal mờ Hìu sơnơm quân y 175, bal mờ mpồl lơh sơnơm ling klàng tiah đah mat tơngai lik dà lơgar crơng gơs 2 anih tờm sơm cau kòp Kovid-19 in.”

Broă sơm kòp gam là bơta lòng bơh đah cau kòp tŭ uă cau kòp ờ bài lơh bal nàng sơm kòp, tă săng phan bơna, măi mok bơh tàm să, lah, lơh bác sỹ mờ cau lơh sơnơm... Mơya bơh bơta git wă tơl làm, ală bác sỹ ling klàng kung gam jơh nùs gròi sền. Bè jơnau yal bơh Thượng tá Vũ Đình Ân, anih tờm sơm cau kòp Kovid-19 in: “Cau kòp ờ gŏ jai tă nhơm, hơ̆ sồng khi rơ ngòt tai, gơ drồl khi là tài bơh tơngoh ờ tơl oxy, mờ dilah he ờ git tàm pà al mờ khi den he tìs, mờ jơnau gơ lời wơl là cau kòp chơt. Bè ờs den dùl nă cau kòp là jơh dùl hìu bơnhă kơlôi rơcang, ngai do den cau do, ngai ndai den cau ndai. Mơya tàm do 1 nă pal sền ală dơ̆ ờ gơtùi tă nhơm bơh cau kòp dê den hơ̆ sồng git kòp Kovid-19 gơ ngòt rơ ngơt bè lơi.”

Dơ̆ bơ tờp kòp Kovid-19 tàm ƀòn dờng Hồ Chí Minh neh gơ ơm sùm tàm bồ tơngoh bơh klau pơnu pa rơp rlau 20 sơnam bè Dương Thanh Hoàng, Mpồl đơng lam ling klàng quận 7, Gah đơng lam ling klàng ƀòn dờng mờ ală cau ling bal tàm ală mpồl lơh broă kuơmàng: hơ̆ là jun chu ƀồc ală cau chơt tài bơh kòp Kovid-19 kung gam ală jơnau kah kơlôi ờ gơtùi huĭ. Ală bi pal sơrlèt gan ală dơ̆ tơngòr tàm nùs, ală bơta rơngòt nàng bal mờ cau ling bal jun tơngac gơl gùng dut ndơl mờ ală cau ờ bơtuah mờ bơta nền nòn, tam pà bal mờ yŭ rơ yùm jàu wơl ƀồc ntìng rê mờ tơl hìu bơnhă cau chơt: “Tŭ uă den geh bơh 10 tus 15 nă cau chơt dùl ngai, uă tŭ bol hi rê tus trồ jrô bơnăng den klo yal bol hi pal pơn jat tai lòt tus àng drim ngai tơ nơ̆ hơ̆ sồng geh rê.”

Ờ mìng lơh tơn tàm mpồl lam lài mờ virus Sars KoV-2, mpồl ling gam tus bal tàm tơl gah bơh tam cah is tus gròi sền rài kis làng bol, sền gàr ring lơngai ờdo ờdă mpồl bơtìan. Ling klàng neh ai jơh bal rơndeh par tus rơndeh coh nàng pơndiang phan lơh sơnơm, phan bơna, phan ngui sa pal geh dong kờl tus tơl hìu sơnơm, tơl gơl gùng, tơl ƀòn làng bol ơm kis. Cau ling sùh dà kơl hề tài bơh trồ tơngai halà sùh tài bơh dà mìu, mơya tơl hộp sơnơm, tơl kĭ phe, nai tap, căp biap kung sùm geh sền gàr niam nàng jàu tus tê làng bol in tàm tŭ kal ke. Bơta lơh ngan huĭ să tờm bơh ală bi dê geh làng bol ki ngàm ngan: “Añ ờ git đơs bè lơi, mìng git ưn ngài jơh tơl nă, kung kơ nờm geh ală cau ling hơ̆ sồng geh  bè do, hìu bơnhă añ ờ git lơh bè lơi. Ưn ngài ngan.”

Gơnoar atbồ ală tiah geh kòp đơs niam ngan bơta tă pơgồp dà kơl hề pràn kơldăng ngan, jơh nùs ngan, geh cồng nha bơh ling klàng dê tàm tơngai kal ke  ngan rlau jơh. Phó Ƀí thư Thàñ ủy, Củ tịc Ủy ƀan Ñân zân ƀòn dờng Hồ Chí Minh ông Phan Văn Mãi đơs: “”Cau ling ờ mìng tam lơh mờ jơnau sồr bơh cau đơng lam bồ dê mờ gam tam lơh mờ jơnau sồr plai nùs dê tai, cau ling neh tus mờ làng bol tŭ làng bol kal ke, làng bol bòl glar, làng bol kòp tê jê să, tŭ làng bol pal kong mờ bơta kis jŏ, geh tŭ là kơlôi rơcang làng bol in ờ bơtuah sang rài. Jat añ cau ling tàm kah yau ling klàng dê geh ală pang pa pal pơn iờ să ngan bè cau ling dong làng bol sơndră kòp bơ tờp.”

Tàm dơ̆ sơndră mờ bol sò tơm ờ geh să jan bè kòp Kovid-19, mờr 2 nam do, dùl dơ̆ tai đơs nền ală bơhìan niam bơnĕ bơh ling klàng làng bol Việt Nam dê, hơ̆ là Bulah khat tàm bơta kal ke lơi, ling klàng kung sùm là mpồl lam lài. Tàm tơl bơta gơlik geh, tơl tŭ tơngai, rùp hin cau ling wa Hồ neh gơ gơs là anih kơldìng kơ̆ kơljap ngan bơh làng bol dê. Mìng is tàm dơ̆ bơ tờp kòp dơ̆ 4, Ƀộ Quôk phòng neh lam lơh dơ̆ ai ling lòt lơh kơ nòl dờng ngan rlau jơh kờp bơh tơ nơ̆ tam lơh mờ broă ai rlau 130 rbô nă ling tus dong kờl ƀòn dờng Hồ Chí Minh mờ ală càr tiah đah jum dà lơgar sơndră mờ kòp Kovid-19.

Cau mblàng K’Duẩn