VOV4.K’ho- Drim òr (01/06), Bộ Quốc phòng neh bơyai lơh pơrjum pờ tơlĭk tàm internet gùt ling klàng lơh jăt kơnòl, broă lơh jal mhar sơndră, tam dră mờ kòp Covid-19 tàm ling klàng tus 187 anih pờ tơlĭk.

Kòp gơtờp dơ̆ 4 do, ală mpồl ling neh tơnguh rơlao 1 rơbô nă cau dong kờl tàm tiah tờm gơtìp kòp càr Bắc Ninh mờ Bắc Giang, tàm hơ̆ geh mpồl xét nghiệm ntrờn mờ 43 mpồl ai phan geh ai tus. Kung tàm càr Bắc Ninh, Bắc Giang, Bộ Quốc phòng neh lơh 3 hìu sơnơm ing nàng sơm cau gơtìp kòp Covid-19, neh dờp sơm kòp 641 nă cau kòp. Bơh bồ nam tus tŭ do, ală quân khu, Bộ tư lệnh ală càr, ƀòn dờng neh rơcang lơh jăt ală gùng dà broă lơh tàm broă sơndră mờ tam dră mờ kòp, dong kờl ală tiah sơndră, tam dră mờ kòp.

Bộ Quốc phòng tŭ do gam geh sùm 1 rơbô 906 mpồl kơrian mờ rơlao 12 rơbô 800 nă cau nàng sền gròi tiah nhàr dà lơgar, kơrian cau mŭt ờ di mờ adăt boh lam. Bơh bồ nhai 5 tus tŭ do, ală mpồl kơrian, sền gròi tiah nhàr dà lơgar neh jào ală càr in tam cah is mờr 5 rơbô nă, tàm hơ̆ geh gŏ rơlao 1 rơbô 800 nă cau mŭt tàm lơgar ờ di mờ adăt boh lam, mìng là tàm tiah nhàr dà lơgar rềp mờ lơgar Campuchia mờ lơgar Lo.

Cau mblàng Ndong Brawl