VOV4.K’ho- Mpồl đơng lam ling sền gàr tiah nhàr dà lơgar pa geh sră nggal pơyoa tus ală pôs ling tàm Mpồl đơng lam mờ Mpồl đơng lam ling sền gàr tiah nhàr dà lơgar ală càr tiah nhàr dà lơgar pơn jăt tai lơh jăt nền nòn broă sền gròi tàm gơl gùng nhàr dà lơgar ù gờl nàng sơndră mờ kòp Covid-19.

    Mpồl đơng lam ling sền gàr tiah nhàr dà lơgar tus sền gròi anih sền gròi kòp tiah nhàr dà lơgar hờ đah tô

Jăt mờ hơ̆, sồr mpồl ling sền gàr tiah nhàr dà lơgar tàm ală càr pơgồp bal nền nòn mờ gơnoar atbồ nàng chồl pràn broă lơh gùt làng bol yal yă ală cau mŭt bơh lơgar bơdìh ờ di mờ adăt boh lam tàm lơgar Việt Nam geh Thủ tướng Chính phủ lam sồr; hòi jà jơh ală mpồl lơh broă chính trị, gùt làng bol lơh jăt tơrgùm bal, tơl ală bơta, pràn kơl dang, geh cồng nha rơlao tàm broă sơndră mờ kòp, gàr niam bơta lơngăp lơngai dà lơgar, ờ do ờ dă mpồl bơtiàn tàm tiah nhàr dà lơgar.

Tus bal lơh jăt ală broă lơh tờm, gĭt ală bơta mờ yal lài di bơta geh; atbồ nền nòn ù tiah, cau, ală gùng lam cau mŭt, lĭk gan nhàr dà lơgar ờ di mờ adăt boh lam nàng bơ̆t bơtàu rơndăp broă lơh, ai geh ală dơ̆ lơh broă tờm, tam dră geh cồng nha, ờ do ờ dă bè ală gah broă.

Cau mblàng Ndong Brawl