VOV4.K’ho- Geh bơta ring bal bơh Mpồl duh broă tĕ khà dà lơgar, ngai hìng 22/5, 7 Pôs đồng ling sền gàr tiah nhàr lơgar mờ Tiểu đoàn pơlam tàp cơ động, gơwèt Mpồl ling sền gàr tiah nhàr lơgar càr Dak Lak geh lơh gờñ dơ̆ tĕ khà pồ Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026. Tus tŭ do, tơl broă rcang lài neh geh Mpồl ling sền gàr tiah nhàr lơgar càr Dak Lak pơgồp bal mờ Ủy ban tĕ khà càr Dak Lak rcang lài niam ngan, rcang wă rò gĭt nđờ rơhiang nă cau tĕ khà “Ling geh griăt tơlir” lòt đùh sră lơh jat gơnoar mờ kơnòl broă làng bol dê.

Geh mat tàm Pôs đồng ling sền gàr tiah nhàr lơgar  737, xã Ia R’vê, kơnhoàl Ea Súp ală ngai do, bol añ sền gŏ geh nùs nhơm hô hơng ngan bơh ngai chờ tĕ khà dê. Tàm tiah tĕ khà sồ 11 (Hìu pơrjum pôs đồng ling sền gàr tiah nhàr 737 dê), broă lơh bơka niam wơl hìu pơrjum, ƀồm sơnơm lơh kloh khuẩn, lĭp sră cih mat Kuang bàng tơlik mat tĕ khà, sră cih mat cau tĕ khà, thùng ơn sră đùh... neh geh rcang lài sir lơm.

Mpồl ling sền gàr tiah nhàr lơgar càr Dak Lak pơgồp bal mờ Ủy ban tĕ khà càr Dak lak rcang lơh sir drơng broă tĕ khà gờñ tàm ală Pôs đồng ling sền gàr tiah nhàr mờ Tiểu đoàn pơlam tàp cơ động

Binh nhất Hà Văn Piêng 21 sơnam, gơwèt Pôs đồng ling sền gàr tiah nhàr lơgar 737 đơs, do là dơ̆ tĕ khà sơnrờp mờ să tờm añ geh tus bal đùh sră. Jơh dùl nhai do, tàm tŭ ơm rlô tơnơ̆ dơ̆ lòt ling, bi bal mờ cau ling bal sùm tus tàm hìu pơrjum do là tiah lĭp sră cih mat kuang bàng tơlik mat tĕ khà sền nàng gĭt ală cau tơlik mat tĕ khà nàng kơlôi sơnơng, sac rơwah. Tus tŭ do, bal mờ gĭt lơh jơnau yal tơngĭt  bè rài kis ală Kuang bàng tơlik mat tĕ khà, den tơl nă cau tàm mpồl ling dê kung neh dờp geh sră tĕ khà, rcang lòt đùh sră tàm ngai hìng 22/5.

Añ sùm kơlôi sơnơng rài kis ală Kuang bàng tơlik mat tĕ khà mut tàm Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026. Añ kơ̆p kờñ sac rơwah geh ală cau geh tơl nùs nhơm niam, tơl bồ tơngoh jak chài mut tàm Quốc hội mờ Hội đồng Nhân dân ală kấp nàng khi in pơgồp dà kơl hề, pơgồp bơta pràn bơt bơtàu ƀòn lơgar, dà lơgar pas pràn.

                Ala mat ală mpồl tĕ khà lĭp sră cih mat Kuang bàng drơng broă cau tĕ khà in sền gĭt rài kis ală Kuang bàng tơlik mat tĕ khà

 Thượng tá Nguyễn Xuân Sơn, Chính trị viên Pôs đồng ling sền gàr tiah nhàr lơgar 737 pà gĭt, lơh jat jơnau sồr bơh Gah đơng lam mpồl ling sền gàr tiah nhàr lơgar càr Dak Lak kung bè kấp hơ đang dê bè lam lơh broă rơndap lơh tĕ khà gờñ, uă ngai do, Đảng ủy mờ Mpồl đơng lam pôs đồng bơyai lơh uă dơ̆ mblàng yal bè Adat tĕ khà, rài kis ală Kuang bàng, gơnoar mờ kơnòl broă bơh cau tĕ khà dê tus mờ Kuang bàng, cau ling tàm pôs đồng. Ai 9 nă Kuang bàng pôs đồng pơgồp bal mờ Ủy ban tĕ khà càr Dak Lak crơng gơs mpồl tĕ khà, cih mat cau tĕ khà, lĭp sră yal loh làng rài kis Kuang bàng cau tơlik mat tĕ khà nàng Kuang bàng, cau ling in kơlôi sơnơng, sac rơwah. Bal mờ hơ̆, Đảng ủy pôs đồng dê kung sồr 100% khà ling ơm gak, tơnguh broă lơh lòt sền, sền gròi gàr niam bơta lơngap lơngai tiah nhàr lơgar mờ ală tiah đùh sră, uă ngan là tàm tơngai kòp Covid-19 gơlik geh kal ke. Thượng tá Nguyễn Xuân Sơn đơs:

Tus tŭ do bol añ neh rcang sir jơh tơl broă lơh drơng broă tĕ khà gờñ in. Jơh ală băng rôn, jơnau đơs, cih mat cau tĕ khà mờ Kuang bàng ndrờm geh yồng mờ lĭp sră jơh, thùng ơn sră đùh kung neh lơh sir sơl; broă dờp sră tĕ khà kung neh dờp ai ală Kuang bàng, cau ling  tàm pôs đồng in. Bơdìh mờ hơ̆, tài bơh kòp Covid-19 gơlik geh kal ke, bol añ bơyai lơh niam ngan mờ ală broă lơh hòi jà mpồl ling klàng lơh sơnơm bơyai lơh ƀồm sơnơm lơh kloh khuẩn jơh gùt tiah đùh sră, lài mờ tŭ đùh sră geh lơh broă lơh was să jan, sồr pal pơn chèu glòm muh mat, ơm yah ngài nàng bơyai lơh đùh sră ờdo ờdă.

Ling sền gàr tiah nhàr lơgar càr Dak Lak geh 8 anih tĕ khà gờñ dơ̆ tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021 - 2026 

Mpồl ling sền gàr tiah nhàr lơgar càr Dak Lak tŭ do atbồ gơl gùng tiah nhàr lơgar jòng rlau 74 kơi sồ, rềp nhàr bal mờ càr Muldunkiri, lơgar Campuchia. Jat đại tá Phạm Hữu Chiến, Chính ủy Mpồl ling sền gàr tiah nhàr lơgar càr Dak Lak đơs, tài bơh ờs mờng broă lơh, geh bơta ai gơnoar broă bơh Mpồl duh broă tĕ khà dà lơgar dê, 7 Pôs đồng ling sền gàr tiah nhàr lơgar mờ Tiểu đoàn pơlam tàp cơ động gơwèt Mpồl ling sền gàr tiah nhàr lơgar càr Dak Lak geh bơyai lơh tĕ khà gờñ lài 1 ngai.

Đại tá Phạm Hữu Chiến đơs, nàng gàr niam broă tĕ khà geh bơyai lơh ờdo ờdă kung bè lơh jat kơnòl broă sền gàr gơnoar tờm, sền gàr bơta lơngap lơngai tiah nhàr lơgar bơh dà lơgar dê tàm tơngai kòp Covid-19 gơlik geh kal ke, mpồl ling pơgồp bal mờ Ủy ban tĕ khà càr Dak Lak crơng gơs 8 mpồl tĕ khà tàm 7 Pôs đồng ling sền gàr tiah nhàr lơgar mờ Tiểu đoàn pơlam tàp cơ động drơng broă tĕ khà. Broă lơh rcang lài ai dơ̆ tĕ khà gờñ in neh lơh sir, rcang wă rò cau tĕ khà tàm ală mpồl ling dê. Đại tá Phạm Hữu Chiến đơs:

Bol añ pơgồp bal mờ gơnoar atbồ tiah do dê crơng gơs ală tiah tĕ khà, anih đùh sră tàm ală pôs đồng ling sền gàr tiah nhàr lơgar mờ Tiểu đoàn pơlam tàp cơ động mờ broă lơh rcang lài neh lơh sir jơh. Broă lơh bơh mpồl ling sền gàr tiah nhàr lơgar pal  ơm gak, sền gàr kơ̆ kơljap tiah nhàr lơgar, rcang kơryan mờ cau mut tàm lơgar tìs mờ adat boh lam tàm tơngai kòp Covid-19 gơlik geh kal ke, bol añ geh tam pà mpồl ling tàm pơdar rê tàm ală tiah nàng đùh sră lơh jat broă lơh tĕ khà; ală mpồl lơh broă tàm anih kơryan ơm ngài mờ tiah tĕ khà geh jun thùng đùh sră ing tus nàng ală Kuang bàng, cau ling tàm anih kơryan in lơh jat gơnoar đùh sră jat di mờ Adat tĕ khà dê.

Mờ broă rcang lài niam ngan bè phan bơna, sền gàr bơta lơngap lơngai, gah lơh sơnơm tàm tơngai kòp Covid-19 gơlik geh kal ke bơh Mpồl ling sền gàr tiah nhàr lơgar càr Dak Lak mờ Ủy ban tĕ khà tàm càr, gĭt nđờ rơhiang nă cau tĕ khà “ling geh griăt tơlir” tàm tiah nhàr lơgar Dak lak neh rcang ai ngai chờ dờng, lòt đùh sră pồ nàng sac rơwah ală Kuang bàng jak chài ngan mut tàm Quốc hội khoá 15 mờ Hội đồng Nhân dân ală kấp tơngai lơh broă bơh nam 2021-2026

          Cau cih Tuấn Long – Cau mblàng K’ Hạnh