VOV4.K’ho- Pa do, Bộ Quốc phòng mờ Tỉnh ủy Đồng Nai pơgồp bal bơyai lơh Cribơyai jak chài “Ling tơngklàs tiah đah jum dà lơgar Việt Nam: gơnoar broă, kơnòl broă mờ jơnau bơsram jơnau kah yau”. Tus bal cribơyai geh ồng Nguyễn Tân Cương là Trung tướng, Ủy viên Đảng Dà lơgar, Thứ trưởng Bộ Quốc phòng; ồng Nguyễn Trọng Nghĩa là Thượng tướng, Ủy viên Đảng Dà lơgar, Phó Kuang ătbồ Tổng cục Chính trị Mpồl ling klàng làng bol Việt Nam; kuang đơng lam bồ Tỉnh ủy, Ủy ban Nhân dân, Gah đơng ling klàng mờ uă gah sơnah lơh broă, mpồl cau ală càr, ƀòn dờng tiah đah jum dà lơgar dê.

Pơgăp mờ do 60 nam, lơh jăt Kơrnoat bơh Bộ Chính trị dê, ngai 15/2/1961 tàm tiah tam lơh Đ, Ling tơngklàs tiah đah jum dà lơgar Việt Nam geh yal bơr crơng gơs tàm bơta tơrgùm bal mpồl crong tàm do mờ mpồl ling tus bơh tiah đah tô dà lơgar. Tŭ hơ̆, broă tơrgùm bal ală mpồl phàu crong tơngklàs tiah đah Jum dà lơgar đơs tus bơta dờng kràñ bơh mpồl phàu crong dê tàm tiah đah jum dà lơgar mờ bơta tam gơl să bơh kăc màng dê tus tŭ tơngai pa, là tŭ tơngai lơh dơ̆ tam lơh kăc màng.

Ling tơngklàs tiah đah jum dà lơgar Việt Nam là dùl bơnah bơh Mpồl ling klàng làng bol Việt Nam dê, să tờm tơn tus bal tam lơh tàm tiah tam lơh tiah đah jum dà lơgar, bơh bơta đơng lam bồ hơđang hơđơm dùl nùs bal, ring bal bè jơh ală bơta bơh Ban Chấp hành Đảng dà lơgar dê mờ bơta đơng lam ring bal bơh Bộ Quốc phòng dê- Kuang đơng lam bồ Mpồl ling klàng làng bol Việt Nam dê, să tờm tơn là Cục tiah đah jum dà lơgar mờ Mpồl lơh broă ling klàng gơwèt Cục tiah đah jum dà lơgar. Đơs tàm dơ̆ cribơyai, ồng Nguyễn Trọng Nghiã là Thượng tướng, Ủy viên Đảng Dà lơgar, Phó Kuang ătbộ Tổng cục Chính trị Mpồl ling klàng làng bol Việt Nam mblàng sền đơs loh bơta crơng gơs bơh Ling tơngklàs tiah đah jum dà lơgar Việt Nam dê bè do: Nàng lơh kăc màng Việt Nam bơtàu tơnguh den pal lơh jăt gùng lòt kăc màng, hơ̆ là ntàu tam lơh nàng ai geh gơnoar ătbồ gơ rê tàm tê làng bol dê. Ntàu tam lơh bơh broă lơh pơgồp bal đah tam lơh chính trị mờ tam lơh phàu crong. Bơh bơta gĭt nền hơ̆, Đảng he neh geh gùng dà bal mờ bơta bơtàu tơnguh bơ̆t bơtàu mpồl chính trị den pal mhar bơtàu tơnguh mpồl phàu crong tàm tiah đah jum dà lơgar. Bơh hơ̆ crơng gơs Ling tơngklàs tiah đah jum dà lơgar Việt Nam.

Rơndeh sơtăng ling tơngklàs tiah đah jum dà lơgar dê mŭt sò tơm tàm gơlăng Độc lập

Rlau 90 jơnau cih đơs bơh ală kuang ling dê là kuang đơng lam bồ, lài do là kuang đơng lam bồ ală mpồl ling, ală cau kơlôi sơnơng tàm dơlam mờ bơdìh mpồl ling, ală cau sền gŏ jơnau kah yau geh pơyua tus dơ̆ cribơyai jak chài do in neh lơh jrô ơnàng rlau tai gơnoar broă, bơta gơtha bơh mpồl Ling tơngklàs tiah đah jum dà lơgar Việt Nam dê tàm dùl tŭ tơngai kah yau kuơmàng bơh dà lơgar dê.

Ală jơnau cih đơs geh sền tàm dơ̆ cribơyai đơs sùm: Kờp bơh ngai crơng gơs tus dì tŭ tơn jơh gơnoar broă kah yau tàm ngai 7/7/1976, Ling tơngklàs tiah đah jum dà lơgar Việt Nam neh lơh sir jak ngan kơnòl broă mờ Đảng mờ Mpồl ling dê jàu kơnòl, tam lơh ndang, bơ̆t bơtàu ndang, bơtàu tơnguh mpồl ling, bơh tam lơh dờng kấp đại đội, tiểu đoàn tus tơrgùm bal binh chủng tam lơh dờng.

Ling tơngklàs tiah đah jum dà lơgar Việt Nam neh lơh geh uă cồng nha tàm dơ̆ tam lơh, cih tềl jrô ơnàng ngan tềl kah jơnau kah yau, bè: Ấp Bắc, Bình Giã, Đồng Xoài, Vạn Tường, Plây Me; tam lơh jai pha 2 dơ̆ dră wơl pràn ngan kàl prang nam 1965- 1966; 1966- 1967, lơh geh bơnàng jă kuơmàng nàng Bộ Chính trị in lơh nền pờ dơ̆ Ntàu tam lơh dờng kàl prang bồ sơnam pa sa tềp Mậu Thân nam 1968, lơh gơs bơta tam gơl bơh dơ̆ tam lơh dê, lơh Mỹ pal dờp jơnau sồr nggui tàm kƀàng cribơyai.

Ling tơngklàs tiah đah jum dà lơgar neh tam lơh jai pha dơ̆ lòt ling Junction City bềng bơta hàm hà bơh Mỹ- Ngụy dê, ai geh bơta pha lin tàm dơ̆ dră wơl pràn ngan nam 1972, pơgồp bơnah kuơmàng lơh Mỹ pal kĭ Hiệp định Paris, tơn jơh tam lơh, tơn rê ling hờ lơgar tờm. Ling tơngklàs tiah đah jum dà lơgar neh bal mờ ling klàng làng bol gùt lơgar lơh geh bơta pha lin tàm dơ̆ Tam lơh dờng kàl prang nam 1975, tơngklàs jơh gùt tiah đah jum, tơrgùm dùl dà lơgar.

Cribơyai neh lơh jrô ơnàng rlau tai uă broă, bơtòm tơrgùm wơl ală jơnau bơsram geh kuơ ngan, mờng chài dờng màng ngan, pà gŏ ală jơnau bơh tài lơh geh bơta tam lơh jai pha bơh Ling tơngklàs tiah đah jum dà lơgar Việt Nam dê. Do là bơnàng jă nàng ală kấp, ală gah in lùp bơsram, đòm jăt tàm broă kơlôi sơnơng, dan gùng dà broă lơh bơ̆t bơtàu Mpồl ling “kăc mạng, lơh kơnòl broă sùm, ngac ngar, rơhời tam gơl pa jak chài”, bơ̆t bơtàu rài sền gàr dà lơgar jơh gùt làng bol pràn kơldang kơ̆ kơl jăp, pơgồp bơnah lơh geh tiah ơm kis ring lơngai, kơ̆ kơl jăp nàng bơ̆t bơtàu mờ bơtàu tơnguh dà lơgar tàm tŭ tơngai pa.

Ồng Nguyễn Hoàng Nhiên là Thiếu tướng, Tiến sĩ, Kuang ătbồ Viện Jơnau kah yau Mpồl ling klàng Việt Nam ai geh ală jơnau bơsram mờng chài tàm ală tŭ bơyai lơh bơ̆t bơtàu mpồl Ling tơngklàs tiah đah jum dà lơgar Việt Nam bè do: Geh uă ngan jơnau bơsram mờng chài, jơnau bơsram dờng ngan rlau jơh là bè bơyai lơh mờ bơ̆t bơtàu mpồl ling. Jơnau bơsram mờ bol he ai geh là tàm dơ̆ tam lơh mờ Mỹ dong klàs dà lơgar, gơ jăt tàm bơta geh ngan bơtàu tơnguh bơh dơ̆ tam lơh dê mờ mpồl geh bơyai lơh dipal. Ngai do, bol he đòm jăt jơnau bơsram hơ̆ nàng bơ̆t bơtàu mpồl ling klàng mờ mpồl phàu crong.

Do là dơ̆ sơnrờp Cribơyai jak chài kấp Bộ Quốc phòng bè tơngume Ling tơngklàs tiah đah jum dà lơgar Việt Nam geh bơyai lơh nàng kờñ lơh loh bơta crơng gơs, ală tŭ tam lơh, bơtàu tơnguh mờ dờng kràñ bơh Ling tơngklàs tiah đah jum dà lơgar Việt Nam dê, bơh hơ̆, ai geh ală jơnau bơsram mờng chài nàng đòm jăt tàm broă lơh bơto bơtê, pơlam tàp tam lơh bơh ală cau bơsram, hìu bơsram, anih lơh broă, mpồl lơh broă tàm jơh gùt ling klàng mờ jơh gùt làng bol dê. Mơkung tơngŏ bơta kah rơngal, tơlik nùs nhơm gĭt ưn ngài jrô ơnàng gơwèt mờ ală rơnàng kuang bàng, cau ling neh khin cha jak chài chơ̆t phi sa tài bơh broă lơh tam lơh dong klàs jơi bơtiàn mờ sền gàr Dà lơgar.

Ồng Nguyễn Văn Sáu là Đại tá, Phó Kuang ătbồ Viện Jơnau kah yau Mpồl ling klàng Việt Nam, pà gĭt: cribơyai pơn jăt tai sền swì gơnoar broă bơta gơtha dờng ngan bơh ling tơngklàs tiah đah jum dà lơgar Việt Nam dê tàm broă lơh tam lơh dong kờl dà lơgar mờ tam lơh dong klàs jơi bơtiàn, bơh hơ̆ ai geh ală jơnau bơsram mờng chài geh kuơ ngan đòm jăt tàm bơ̆t bơtàu mpồl ling, lơh kơ̆ kơl jăp tơnguh tai bơta pràn rài sền gàr dà lơgar jơh gùt làng bol mờ broă lơh bơ̆t bơtàu Dà lơgar Việt Nam xã hội chủ nghiã. Pơgồp bơnah mblàng yal, bơto bơtê tus kuang bàng, cau ling mờ ală rơnàng làng bol in, tơnguh uă bơta gĭt wă, nùs nhơm pơñiờ să jơi bơtiàn, bơ̆t bơtàu lơh kơ̆ kơl jăp bơta pin dờn, ngui niam mpồl tam klăc dờng jơh gùt jơi bơtiàn mờ bơta pràn jơh gùt jơi bơtiàn tàm broă lơh bơ̆t bơtàu mờ sền gàr Dà lơgar.

Cau cih VOV1- Cau mblàng Lơ Mu K’Yến