VOV4.K’ho- Lơh jăt broă ring bal đah Quốc hội lơgar Việt Nam mờ Quốc hội lơgar Lào, drim òr (18/10), tàm hìu Quốc hội, Ủy ban Khoa học, Công nghệ mờ Môi trường Quốc hội Việt Nam pơgồp bal mờ Ủy ban Đối ngoại bơh Quốc hội lơgar Lào bơyai lơh pơrjum pờ tơlik tàm internet nàng cri bơyai bal broă lơh mờng chài bơ̆t bơtàu adăt đo was mờ sră wăc sềr rùp ù tiah.

Chủ nhiệm Ủy ban Đối ngoại Quốc hội lơgar Lào ồng Sanya Praserth đơs loh, rơndăp broă adăt đo was mờ crơng gơs sră wăc sềr rùp ù tiah gam geh lơh, kờp dŭ geh yal mờ Quốc hội lơgar Lào khoă 9 sền sơwì tàm pơrjum dơ̆ 2, nàng geh ai kơrnoăt, broă atbồ mờ sền gròi, lùp sền broă đo was, sră wăc sềr rùp ù tiah geh lơh ring bal, di pal, lơh pa, tơrgùm bal mờ dunia. Chủ nhiệm Ủy ban Đối ngoại Quốc hội lơgar Lào kơ̆p kờñ geh dờp ală broă pơgồp bal bơh jơnau bơsram broă mờng chài mờ broă ngui ờ uă jơnau bơsram broă mờng chài bơh ală lơgar tàm dunia tàm broă lơh, lơh jăt adăt đo was mờ sră wăc sềr rùp ù tiah Quốc hội lơgar Việt Nam.

Cau mblàng Ndong Brawl