VOV4.K’ho- Bộ Y tế jàu ală hìu sơnơm kấp dà lơgar lơh 3 rbô nơm jơ nờng lơh pràn wơl să jan tàm ƀòn dờng Hồ Chí Minh. Hơ̆ là jơnau đơs nền bơh Bộ trưởng Bộ Y tế ồng Nguyễn Thanh Long dê tàm dơ̆ lơh broă mờ Thành ủy, Ủy ban Nhân dân ƀòn dờng Hồ Chí Minh bè broă lơh rơcang sơndră kòp tàm ƀòn dờng tàm drim ngai 29/7.

Bộ trưởng Bộ Y tế ồng Nguyễn Thanh Long đơs là, bơta pal sền gròi ngan rlau jơh bơh ƀòn dờng Hồ Chí Minh dê tŭ do là lơh bè lơi nàng gơtùi sơm bời ală cau kòp jroă, cau gơtìp ngòt rơngơt in mờ tơrmù khà chơt să. Bơdìh mờ ală mpồl lơh broă ngac ngar neh ai tus lài hơ̆, Bộ Y tế pơn jat tai ai jơh ală kuang đơng lam bồ Cục mờ Vụ geh gơ rềng mờ kuang atbồ ală hìu sơnơm khà kuơmàng, hìu sơnơm chuyên khoa kấp dà lơgar mut tàm ƀòn dờng Hồ Chí Minh nàng pơgồp bal bơta pràn bơt bơtàu mpồl sơm kòp, kuơmàng là mpồl lơh pràn wơl să jan jơh nùs ai cau kòp Covid-19 in.

Cau mblàng K’Duẩn