VOV4.K’ho- Bơh lồi nhai 08 tus tŭ do, càr Dăk Nông neh ai kơnòm bơsram in lòt bơsram tơn tàm hìu bơsram. Pơgồp bal niam mờ ală mpồl lơh broă tàm broă lơh rơcăng sơndră kòp Covid-19, gah bơto bơtê neh ngac ngar ală broă lơh bơto bơtê gơdờp. Sở Giáo dục mờ Đào tạo càr Dăk Nông pà gĭt, bơh lồi nhai 08 nam 2021, gơ jăt tàm bơta kòp tàm tơl tiah mờ càr ngui ngac ngar ală broă lơh bơsram sền gàr ờdo ờdă.

Kơnòm bơsram Hìu bơsram kấp bàr Dăk Man, kơnhoàl Krông Nô đo bơta duh să jăn mờ ràu kloh khuẩn is tê mờ măy mok

Hơ̆ là pơgồp bal broă bơsram bơh tàm internet mờ bơsram tơn tàm ơdŭ, tam pà kơnòm bơsram tus hờ hìu bơsram ơm yah ngài 50- 50, halà bơsram yah jăt ngai dơ̆ 2- 4- 6, 3- 5- 7 tàm poh. Mìng ală tiah gam pal ơm yah ngài lơh sơnơm, ơm yah ngài kràñ cê ngan den hơ̆ sồng pal bơsram bơh tàm internet. Tŭ bơyai lơh bơsram tơn tàm ơdŭ, càr Dăk Nông neh xét nghiệm săc rwah tàm ală hìu bơsram geh kơnòm bơsram tus bơh uă tiah. Kơnờm broă lơh do mờ Ngai Sơnđờm mŭt nam bơsram pa ngai 05/09, càr neh gŏ kơnòm bơsram bơtờp kòp Covid-19, mờ jòi bàn sơlơ̆u wơl tiah bơtờp kòp tàm mpồl bơtiàn nàng kơryan. Tŭ do, nàng “gơdờp ờdo ờdă, ngac ngar, gròi sền geh cồng nha kòp Covid-19”, Dăk Nông neh lơh mhar broă cĭt vaccine, lơh pràn mblàng yal tơnguh uă bơta gĭt wă bơh jơh tơl nă làng bol dê tàm broă lơh rơcăng sơndră kòp.

Cau mblàng Lơ Mu K’Yến