VOV4.K’ho- Mho ngai 10/12, tàm Hà Nội, Ƀộ Nông nghiệp mờ Phát triển Nông thôn pơgồp bal mờ Mpồl tam gơl pa, bơceh pa lơh sa suơn sre dờng ngan rlau jơh gùt plai ù CGIAR neh bơyai lơh pơrjum pờ tơn tàm internet cribơyai bè ală broă lơh tơnguh lơh broă bal wèt tus bơtàu tơnguh lơh sa suơn sre kơ̆ kơljap tàm lơgar Việt Nam. Đơs tàm pơrjum, Thứ trưởng Nông nghiệp mờ Phát triển Nông thôn ồng Lê Quốc Doañ đơs nền, Việt Nam neh lơh geh bơta gơguh lơh sa niam ngan tàm ală nam do, kuơmàng là tàm gah bơtàu tơnguh lơh sa suơn sre.

Nam 2020, bulah kong gơ rềng tài bơh kòp dờng Covid-19 mơya tac hờ lơgar ndai phan bơna bơh suơn sre, brê bơnơm, phan tàm dà kung gam geh jơnhua ngan, gơguh tus 41 tơmàn dolar Mỹ. Mìng is 11 nhai do, tac hờ lơgar ndai phan bơh suơn sre, brê bơnơm, phan tàm dà geh rlau 43 tơmàn dolar Mỹ, gơguh tus rlau 14% pơndrờm mờ bal dùl tŭ nam lài mờ đơs lài digơlan gơtùi lơh geh mờ sơrlèt rlau jơnau kờñ geh jàu gùt nam. Nàng mut tàm dùl tŭ tơngai bơtàu tơnguh pa bal mờ uă kal ke mờ bơta lòng, Ƀộ Nông nghiệp mờ Phát triển Nông thôn kơp kờñ pơn jat tai dờp geh bơta dong kờl bơh ală cau, ală mpồl dong kờl, ală mpồl lơh broă dunia dê, kuơmàng là ală Mpồl kơlôi sơnơng lơh sa suơn sre bơh CGIAR dê.

Cau mblàng K’Duẩn