VOV4.K’ho- Tiah tờm tơrlòng lài, Viện Vệ sinh dịch tễ dà lơgar neh lơh gơs tơngai dơ̆ 1 cit sơnơm vaccine tơrlòng lài Covivac tàm 120 nă cau tus bal is. Jat Phó Giáo sư, Tiến sĩ Vũ Đình Thiểm, Kuang atbồ Tiah tờm tơrlòng lài pà git, ngai 15/5 pa do, 120 nă cau tus bal is neh lơh gơs broă cit tơl 2 ding sơnơm vaccine Covivac. Kờp dŭ tus ngai 29/5 do, mpồl kơlôi sơnơng geh ai jơh mẫu mhàm nàng lơh xét nghiệm kháng thể 14 ngai tơnơ̆ tŭ cit ding dơ̆ 2 bơh 120 nă cau dê. Tơnơ̆ hơ̆ jơh ală mẫu mhàm lài mờ tĭ cit ding dơ̆ 1, lài mờ tŭ cit ding dơ̆ 2 mờ 14 ngai tơnơ̆ tŭ cit ding dơ̆ 2 geh pơyua tus Canada nàng lam lơh broă sền sơ wì khà kháng thể tàm mẫu mhàm lài mờ tŭ mờ tơnơ̆ tŭ cit.

Tơnơ̆ tŭ geh cồng nha ờ bơtờp kòp bal mờ cồng nha bè bơta ờdo ờdă sơnơm vaccine dê, mpồl kơlôi sơnơng geh yal mờ Bộ Y tế nàng dan tam gơl tus tơngai dơ̆ 2. Kờp dŭ, tơngai dơ̆ 2 geh lam lơh tàm nhai 7 tus do. Covivac là sơnơm vaccine rơcang sơndră kòp Covid-19 bơh Viện Vaccine mờ Sinh phẩm y tế (IVAC) kơlôi sơnơng, lơh gơlik. Sơnơm vaccine tŭ do geh cit tơrlòng lài tơngai dơ̆ 1 tàm Hìu bơsram Đại học Y Hà Nội. IVAC ngui công nghệ vaccine bơh phôi tap iar, là công nghệ lơh gơlik sơnơm vaccine ờs mờng bơh yau, neh geh viện ngui nàng lơh gơlik sơnơm vaccine kòp nggụ kàl.

Cau mblàng K’Duẩn