VOV4.K’ho- Drim ngai 2/7, tàm Hà Nội, geh bơyai lơh pơrjum pờ tơlik tơn tàm internet gùt lơgar sền wơl broă lơh Nội vụ 6 nhai bồ nam mờ lam lơh broă lơh 6 nhai lồi nam gah Nội vụ dê. Bộ trưởng Bộ Nội vụ mò Phạm Thị Thanh Trà đơng lam pơrjum.

6 nhai do, gah Nội vụ neh rcang lài cribơyai, pơgồp bơnah uă ngan tàm bơta lơh geh cồng nha bơh dơ̆ tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026; sùm tam gơl pa tơngume, gùng dà broă lơh đơng lam bồ, lơh jat jơnau cih tàm Nghị quyết pơrjum dờng dơ̆ 13 bơh Đảng dê mờ Pơrjum dờng ală Đảng bộ ală tiah dê. Tàm  dơ̆ pơrjum, ala mat Sở Nội vụ ală càr, ƀòn dờng cribơyai bè ală bơta kal ke, bơta ờ hềt pràn tàm tŭ lam lơh ală Nghị định bơh Chính phủ dê bè anih broă lơh, biên chế công chức, khà cau lơh broă; rơndap tap sèng mpồl lơh broă sră nggal mpồl lơh broă dà lơgar crơng gơs... Ală kuang bàng sồr, Bộ Nội vụ pal geh sră nggal bơto pơlam ngan ngồn rlau tai nàng ală tiah, Bộ, gah sơnah lơh broă in lơh jat.

Đơs pơn dŭt tàm dơ̆ pơrjum, Bộ trưởng Bộ Nội vụ mò Phạm Thị Thanh Trà sồr: ală nhai lồi nam, Sở Nội vụ ală càr, ƀòn dờng pal jat nền jơnau cih tàm Nghị quyết Pơrjum dờng dơ̆ 13 bơh Đảng, mờ bơh Bộ Nội vụ dê dê mờ ală tiah dê nàng tam gơl pa tơngume, gùng dà lam lơh kơnòl broă, iăt, kơno jơnau đơs bơh kơnă hơđơm dê, sùm tàm yal tơngĭt bal jơnau yal mờ Bộ Nội vụ nàng geh gùng dà bơsong.

Cau mblàng K’Hạnh