VOV4.K’ho- Nam 2021, kờñ yal tơngĭt bè broă tơnguh uă jơnau gĭt wă bè gơnoar kòn dềt, sền gàr, drơng gàr kơnòm dềt tàm bơta kòp gơtờp; mờ dong kờl kơnòm dềt gơtìp aniai bơh kòp Covid-19, Nhai lơh broă tài kơnòm dềt tàm bơta rềs àr, kòp gơtờp”. Mờ tơngu me do, tàm tiah Tây Nguyên bal mờ gùt lơgar gam geh uă broă lơh mùl màl gơwèt mờ kơnòm dềt.

Dùl tàm ală broă lơh mùl màl sơnrờp ngan tàm càr Dak Lak là Kes priă dong kờl kơnòm dềt càr do neh bơyai lơh còp să, pà phan mờ bơto sồr tàm broă sơndră mờ kòp Covid-19 gơtờp ai ală kơnòm dềt tàm anih dong kờl mpồl bơtiàn hìu yàng phờk Bửu Thắng (ƀòn dờng Buôn Ma Thuột). Ồng Lâm Đình Nhiên, kuang atbồ Kes priă dong kờl kơnòm dềt càr Dak Lak pà gĭt, gam lơh jăt broă dong kờl lơh 4 nơm hìu nùs nhơm; còp să, lam sồr ală hìu nhă geh oh kòn gơtìp sồt să, chơ̆t jê, hìu nhă geh kòn dềt gơtìp bŭ dà tàm ală kơnhoàl Cư̆ Mgar, Krông Păc, Cư̆ Kuiñ mờ Krông Bông.

Pal geh ală broă lơh niam ờ do ờ dă ală kơnòm dềt in tàm bơta kòp gơtờp

Dong kờl phan sa, phan ngui mờ sền gàr bơta pràn kơl dang să jan, kham rơwah cau gơtìp kòp plai nùs bơh dềt mờ ală bơta ờ niam să jan tàm kơnòm dềt. “Kes priă geh tơrgùm hòi jà, lam sồr ală anih lơh broă, mpồl lơh broă, mpồl lơh sa kă bro bal mờ anih lơh broă chính phủ nàng geh bơta pràn dong kờl ală cau gơtìp kòp jroă bè kòp plai nùs bơh dềt; còp să ală kơnòm dềt gơtìp rềs àr chơ̆t jê, rềs àr bŭ dà. Mờ kuơ màng ngai do neh dong kờl 30 tơlăk ai kơnòm dềt kòn đời tàm anih ròng siam hìu yàng phờk Bửu Thắng in nàng dong kờl dùl bơnah priă blơi phan sa, phan ngui tàm ală ngai kòp gơtờp mờ bơto sồr ală kơnòm dềt tàm broă rơcang sơndră mờ kòp Covid-19”.

Tàm Dà lơgar, Kes priă dong kờl kơnòm dềt Việt Nam bal mờ Bộ Lao động-Thương binh mờ Xã hội neh dong kờl dơ̆ sào ai rơlao 4 rơbô nă kơnòm dềt là F0 mờ F1 pal tam cah is tơrgùm bal nàng sơndră mờ kòp Covid-19. Jăt mờ hơ̆, kơnòm dềt gam sơm kòp, tam cah is tơrgùm bal geh dong kờl priă sa pah ngai mờ khà 80 rơbô đong tàm 1 nă, geh ngui tus jơh nam do.

Còp mờ pà phan hìu ròng siam kơnòm dềt tàm hìu yàng phờk Bửu Thắng- càr Dak Lak

Kòp Covid-19 neh, gam mờ pơn jăt tai lơh aniai tus mờ màng kis, bơta pràn kơl dang să jan bal mờ bơta kuơ kơnòm dềt dê. Jăt broă sền wơl, tàm khà 30 càr geh cau gơtìp mờ kòp Covid-19, geh 18 càr yal geh kơnòm dềt gơwèt mpồl F0 mờ F1. Tàm hơ̆ càr Bắc Giang gam geh khà kơnòm dềt pal tam cah is tơrgùm bal gal ngan mờ gĭt nđờ rơbô nă. Mò Nguyễn Thị Nga, Phó kuang atbồ đah kơnòm dềt, gơwèt Bộ Lao động-Thương binh mờ Xã hội pà gĭt, geh lơh broă do gam hòi jà broă tus bal, dong kờl bal bơh ală mpồl lơh broă, ală cau tàm lơgar bal mờ lơgar bơdìh nàng kơnòm dềt lơgar Việt Nam sơrlèt mờ kal ke tŭ do, dong kờl ală kơnòm dềt geh dùl rài kis tơnơ̆ do niam bơnĕ rơlao. “Tàm ală ngai pa do, bol añ geh sền gròi broă sền wơl kơnòm dềt gơtìp kòp Covid-19 kung bè kơnòm dềt pal lòt tam cah is tơrgùm bal gơwèt F1. Dan ală tiah rơcang dong kờl ală kơnòm dềt, sền gròi bè phan sa, phan ngui kung bè ală broă kờñ ai kơnòm dềt in, tàm hơ̆ uă ngan là bè nùs nhơm gơtìp ờ niam ờ mìng gơwèt mờ mè bèp ală kơnòm dềt mờ gam bơh ală kơnòm dềt kung gơtìp uă ngan sơl”.

Tŭ do, Kes priă dong kờl kơnòm dềt lơgar Việt Nam pơn jăt tai lam sồr, dong kờl ală phan ngui, phan lơh sơnơm bè: chèo sơndră mờ vi khuẩn, dà toh, ào, mpha… ai kơnòm dềt là ală cau gơtìp F0, F1, F2 in tàm càr Điện Biên. Mờ mhar lam sồr, dong kờl ai kơnòm dềt tàm ală càr gơtìp kòp gơtờp bè Bắc Giang, Bắc Ninh in.

Dờp bal Nhai lơh broă tài kơnòm dềt nam 2021, geh ờ uă bộ, gah lơh broă neh geh sră nggal đơng lam lơh jăt ală broă lơh tàm Nhai lơh broă tài kơnòm dềt. Ủy ban Khà kờp làng bol, hìu nhă mờ kơnòm dềt – Bộ Quốc phòng, Bộ Văn hoá Thể thao mờ Du lịch; Bộ Thông tin mờ Truyền thông pơgồp bal mờ Mpồl tam klăc ờ do ờ dă jơnau tơngĭt Việt Nam mờ ờ uă bộ, gah lơh broă gơrềng bal bơyai lơh dơ̆ pơrlòng “kơnòm bơsram mờ bơta ờ do ờ dă jơnau tơngĭt”; Đoàn ơruh pơnu Cộng sản Hồ Chí Minh bơyai lơh sơn đờm kàl rơlô bơkang.

Mò Nguyễn Thị Nga pà gĭt tai: “Cục kơnòm dềt, gơwèt Bộ Lao động Thương binh mờ Xã hội kung geh dong kờl lơh broă bal bơh ală mpồl lơh broă dunia tàm lơgar Việt Nam kung bè ală mpồl lơh broă mpồl bơtiàn. Tàm nhai lơh broă tài kơnòm dềt geh bơyai lơh uă dơ̆ pơrjum cri bơyai mờ kuơ màng ngan là ală dơ̆ pơrjum pờ tơlĭk tàm internet nàng gơtùi yal ală jơnau gĭt wă bè kơrnoăt bè adăt boh lam, broă lơh kung bè ală jơnau gĭt wă mùl màl geh kuơ ai hìu nhă in, ai kơnòm dềt kung bè mpồl bơtiàn in nàng he tus bal sền gàr lơh jăt gơnoar bơh kơnòm dềt dê, tàm hơ̆ uă ngan là kơnòm dềt gơtìp aniai bơh kòp Covid-19”.

Cục kơnòm dềt kung neh geh sră nggal đơng lam Sở Lao động – Thương binh mờ Xã hội ală càr, ƀòn dờng chồl pràn broă lam sồr tàm ală anih yal tơngĭt, internet mpồl bơtiàn, gah viễn thông bè bơta gĭt wă sơndră aniai kơnòm dềt; sơndră rềs àr, chơ̆t jê kơnòm dềt; sền gàr kơnòm dềt tàm broă ngui internet, lam sồr tus mờ Tổng đài điện thoại dà lơgar sền gàr kơnòm dềt jăt sồ 111 tus mờ hìu nhă, mpồl bơtiàn bal mờ kơnòm dềt. Ală càr, ƀòn dờng tơnguh ală broă sơndră mờ kòp Covid-19 ai kơnòm dềt in mờ sền gàr niam ờ do ờ dă ai kơnòm dềt in tàm bơta kòp gơtờp, tàm hơ̆ pal tơrgùm khà gal, cih măt mờ jơnau kờñ kơnòm dềt dê tàm ală tiah gơtìp tam cah ngài mpồl bơtiàn mờ ală hìu tam cah is tơrgùm bal; ngui kes priă bơh Kes priă dong kờl kơnòm dềt cấp càr (di lah geh) ha là kes priă bơh Kes priă dong kờl kơnòm dềt Việt Nam mờ ală khà priă lam sồr ndai nàng dong kờl phan sa, phan ngui geh kuơ, sơnơm mờ ală phan ngui lơh sơnơm bơtơl ai kơnòm dềt in mờ gùng dà broă lơh là ờ lời geh dùl nă kơnòm dềt lơi kờñ, gơtìp kal ke mờ ờ geh dong kờl di tŭ.

Cau mblàng Ndong Brawl