VOV4.K’ho – Tơnơ\ uă nam kơp gơn, pa do, làng bol tàm [òn Mêra, xã Quảng Tân, kơnhoàl Tuy Đức, càr Daknông neh geh lơh gùng che đèng dà lơgar. Do là [òn lồi dut bơh kơnhoàl Tuy Đức dê geh lơh gùng che đèng. Geh đèng, geh ai geh bơta [uơn làng bol in tàm broă bơtàu tơnguh lơh sa kung bè tơnguh niam rài kis nùs nhơm:

Ơm kis tàm [òn Mêra, xã Quảng Tân, kơnhoàl Tuy Đức bơh nam 2006, tơnơ\ rlau 10 nam kơp gơn den tu\ do, bơta àng gùng che đèng dà lơgar neh rê tus mờ hìu nhă mò Hoàng Thị Dương mờ git nđờ rhiang hìu  nhă làng bol tàm [òn. Glah gơm piang mờ đèng, glah ce tơnduh dà là ală phan ngui kuơ màng ngan mờ hìu nhă mò pa blơi. Kơnờm geh đèng mờ gơtùi tềm pềr uă tu\ tơngai rlau pơn drờm mờ lài do:

“Ờ hềt geh đèng den a` ngui đèng mattơngai mìng nàng sòl àng lơm, tu\ do neh geh đèng den he gơtùi gơm piang, [ồm dà, bơh ngai geh đèng go\ rài kis niam rlau, lòt rê geh bơta àng sòl sơl, broă lơh sa bơtàu tơnguh, lơh broă lơi kung go\ gơ bơtàu tơnguh lơm.”

Kung ndrờm bè hìu nhă mò Dương sơl, ồng Điểu Brăng, ơm tàm [òn Mêra chờ hờp ngan tu\ gùng che đèng dà lơgar neh geh lơh tus tàm [òn. Ồng Điểu Brăng pà git, geh đèng là bơta kơp kờ` bơh jo\ làng bol dê tu\ do neh gơ gơs ngan ngồn. Tu\ do làng bol neh geh sền tivi, kơnòm dềt geh bơsram sră tàm bơta àng đèng dê. Làng bol cau lơi kung chờ hờp lơm, iang nùs lơh broă, lơh sa, tơn jơh jơgloh tơmù r[ah. Ồng Điểu Brăng pà git:

“Geh đèng là geh uă bơta kuơ ai hìu nhă in, lài do ờ hềt geh đèng dà lơgar dê den a` blơi đèng mattơngai, tu\ do geh đèng den a` chờ hờp ngan, blơi geh glah gơm piang mờ đèng, tơnơ\ do geh lơh gùng che đèng nàng [ồm dà ngui sa hìu nhă in gơ [uơn rlau, ưn ngài ngan dà lơgar.”

Broă lơh lơh gùng che đèng ai [òn Mêra in di rơndap broă 2081 bơh Thủ tướng Chính phủ dê lơh đèng ai tiah [òn lơgar in bơh gùng che đèng dà lơgar, tàm hơ\ lơh lài ai xã tiah nhàr dà lơgar mờ tiah uă kal ke in tơngai bơh nam 2015 tus nam 2020. Broă lơh do geh mờr 7 kơi sồ gùng che trung áp, 8 kơi sồ gùng che hạ áp, 4 trạm biến áp 220 kV lơh đèng ai 135 hìu nhă tàm [òn in.

Bi Lê Đình Thanh, atbồ mpồl lơh ồs đèng xã Quảng Tân – Dak Rtih, kơnhoàl Tuy Đức pà git, tơnơ\ mờ tu\ geh gùng che đèng dà lơgar, làng bol kờ` pal geh ală bơta git wă kuơ màng nàng git bè đèng, ngui đèng ờ do ờ dă mờ geh cồng nha. Den tàng, tàm tơngai sơn rờp, mpồl lơh ồs đèng xã Quảng Tân – Dak Rtih sùm tus tàm [òn lơgar nàng pơlam làng bol in bơta chài ngui đèng ờ do ờ dă mờ geh cồng nha:

“Làng bol tàm do kal ke ngan bè đèng, bơh lài tus tu\ do, làng bol ờ hềt tu\ lơi ngui đèng den tàng ờ hềt mờng, tu\ do hơ\ sồng geh đèng dơ\ sơn rờp den tàng ờ git. Den tàng lơh gùng che đèng hìu lơi in, he pal pơlam khi ngui đèng ờ do ờ dă, tềm pềr đèng mờ oh mi den sùm pơlam làng bol in.”

{òn Mêra là [òn uă kal ke bơh xã Quảng Tân, kơnhoàl Tuy Đức dê. {òn ngài mờ tiah tờm kơnhoàl rlau 40 kơi sồ, tu\ do geh rlau 135 hìu nhă làng bol ơm kis, uă ngan là làng bol kòn cau, gùng lòt rê kal ke ngan. Lài mờ tu\ geh đèng, ală hìu nhă làng bol tàm do mìng ngui đèng mattơngai nàng pờ àng. Tu\ geh gùng che đèng dà lơgar, làng bol chờ hờp ngan, đèng neh cèng wơl uă bơta kuơ dờng màng tàm rài kis pah ngai, chồl pràn bơtàu tơnguh lơh sa mờ tơnguh niam rài kis nùs nhơm ai làng bol tiah do in. Ồng Bùi Đức Thắng, Bí thư Chi bộ [òn Mêra, xã Quảng Tân pà git:

“Geh bơta sền gròi bơh Đảng mờ dà lơgar dê, neh dong dùl [òn gam r[ah, kal ke, rài kis làng bol gam bòl glar tu\ do neh geh gùng che đèng dà lơgar nàng ngui tàm rài kis. Bơh ngai geh gùng che đèng tus tu\ do den làng bol blơi phan ngui tàm hìu nhă, geh tai bơta git wă, klo tai jơnau mblàng yal bơh ală jơnau đơs tàm rơ dô, tàm tivi. Bơh ngai geh đèng den uă hìu nhă neh [ồm dà tờm kơphe mờ tiêu in, dong tơmù cau lơh broă, geh tai tu\ tơngai nàng lơh ală broă ndai, bơtàu tơnguh lơh sa hìu nhă.”

Bơta àng đèng dê rê tus mờ [òn Mêra, xã Quảng Tân neh pơgồp bơnah tơn jơh bơta [òn ờ geh gùng che đèng dà lơgar tàm kơnhoàl tiah nhàr dà lơgar Tuy Đức. Do là bơta pràn dong kơnhoàl lơh geh jơnau kờ` tơn jơh jơgloh tơmù r[ah, tơnguh niam rài kis làng bol dê nàng pơgồp bal bơta pràn bơt bơtàu [òn lơgar pa.

                                                                   Cau cih mờ yal tơnggit K’Duẩn