VOV4.K’ho - Đơs là gơnoar atbồ xã gam ờ ru mờ broă rơcang sơndră mờ kòp Covid-19 mờ rơcang broă tĕ khà, cau kơñao lơh phan geh is ờ di mờ adăt boh lam neh gơlĭk geh uă tàm xã Hiệp An, kơnhoàl Đức Trọng, càr Lâm Đồng.

Ờ ngòt bơta lơi, ờ pồn jơnau lơi, lơh tàm tŭ trồ mang mờ ngai rơlô lồi poh bè lài do, broă lơh ù, lŭ ờ di mờ adăt boh lam geh bơyai lơh loh làng ngan, geh tiah mìng ngài hìu lơh broă UBND xã mìng 2, 3 rơhiang thơ̆k.

Tàm bă ù lơh sa suơn sre 283, pang sră rùp ù tiah 6A rềp tơn tềng gah brê nho gam hòn tơlir niam, geh gĭt nđờ 10 rơbô khối ù, lŭ neh geh dùl nă cau lam bồ tờ chŏ jơh, pơn diang cèng tàm tiah ndai nàng tăc. Tàm tiah hơ̆, broă lơh gam geh lơh uă ngan, lơh jơh gùt tiah do gơs dùl tiah lơh broă dờng ơnàng. Tŭ bol añ rơ̆p tus, ală rơndeh pơn diang dờng, măi khoàng, phàt lŭ mờ uă cau lơh broă ơpah neh ntoăt dô jơh. Tàm mƀrơs măt, tiah lơh ù, lŭ do mìng gam dùl nơm măi tờ ù dờng mờ ờ geh cau măi.

 Dùl tiah lơh phan geh is tìs mờ adăt boh lam tàm xã Hiệp An

Tiah lơh phan geh is ờ di mờ adăt boh lam do neh lơh broă tàm uă nhai do, rềp ngan mờ ƀòn ơm kis, mìng ngài mờ hìu lơh broă UBND xã ờ tus 2 kơi sồ sơl, mơya gơnoar atbồ xã Hiệp An mìng lơh glài mờ priă 1 dơ̆ nàng geh sền là neh kơrian tàm ngai 27 nhai 4 lài do.

Ồng Uông Thanh Hải, Công chức lơh broă gah ù tiah xã Hiệp An đơs là, tài ờ gŏ di tŭ ală tìs, tài cau kơñao lơh ờm, tàm tŭ mpồl kuang bàng, công chức xã ờ gal mờ geh uă broă lơh pơgồp bal: “Bol añ lơh broă ờ gal cau den tàng ờ gơtùi sền gròi jơh ală broă tờ, chŏ ù, hơ̆ sồng khoàng lŭ ờ di mờ adăt boh lam do. Mùl màl là broă uă ir pơn drờm mờ bol añ. Bơdìh hơ̆ tai, pah tŭ bol añ tus, ală phan lơh broă hơ̆ neh lòt gĭt tàm tiah lơi, ờ kŭp bàn den tàng ờ geh cơng tàng nàng lơh glài broă lơh phan geh is ờ di mờ adăt boh lam do”.

 Gĭt nđờ rơbô khối ù, lŭ tềng do neh geh pơn diang tăc mờ ờ geh cau lơi gĭt

Kuang bàng atbồ den đơs lah tài broă geh uă ir, mơya tàm dùl tiah ndai rềp tơn tềng gùng 20, mìng ngài mờ UBND xã Hiệp An 2, 3 rơhiang thơ̆k kung neh gơtìp bơta ndrờm bal bè do sơl. Ală rơndeh chŏ dờng gam chŏ gam tờ, lơh phan geh is ờ di mờ adăt boh lam tơn tàm tŭ trồ ngai mơya gơnoar atbồ xã sền bè ờ geh bơta lơi. Mìng tus tàm tŭ bol añ tơlĭk rùp mờ lùp là, tiah lơh phan geh is do geh sră ai lơh lah ờ den kuang đơng lam UBND xã Hiệp An hơ̆ sồng bơyai lơh ai mpồl lòt sền gròi nàng gĭt bè bơta tìs mờ lơh sră kŭp mờ lơh glài.

Tềng tiah tờ, chŏ ù, lŭ mìng gam gơlời dùl nơm rơndeh chŏ ờ hềt thàn cèng lĭk bơdìh tiah do

Ồng Hồ Hữu Hiếu, Chủ tịch UBND xã Hiệp An đơs, gơnoar atbồ xã ờ tŭ lơi ờ sền gròi, ờ jai tềng đăp mờ broă tờ, chŏ ù, lơh phan geh is ờ di mờ adăt boh lam do. Ồng đơs là, gơlĭk geh bơta do tài ù tiah tàm xã ơnàng, ù tiah kơh bơnơm gơtìp kal ke, ală cau tìs mờng lơh broă tàm ngai rơlô, trồ mang den tàng kal ke nàng gŏ.

Mơya ồng Hồ Hữu Hiếu kung đơs tai là, xã geh lơh ngan sền gàr niam broă do. “Tơngai pa do, UBND xã neh bơsong uă ngan cau gơtìp tìs. Mơya, tài xã Hiệp An geh bă ù tiah ơnàng, kơh bơnơm kal ke, ală cau sơgràm tàm ală ngai rơlô, bơdìh mờ tŭ lơh broă, trồ mang nàng lơh ờ di mờ adăt boh lam. Tàm tơngai tus, xã Hiệp An geh lơh ngan lơh glài ală cau lơh tìs, nàng bơta tờ, chŏ ù ờ geh lơh tai, kung bè lơh phan geh is ờ di mờ adăt boh lam tàm xã dê”.

“Geh lơh ngan” lơh glài nàng bơta niam geh wơl, jơnau bơh kuang đơng lam xã Hiệp An, kơnhoàl Đức Trọng, càr Lâm Đồng đơs kung pà gŏ, lài do xã atbồ ờ hềt lơh ngan. Mờ bơta do kung neh mblàng tus mờ broă lơh phan geh is ờ di mờ adăt boh lam tàm tiah do, gam gơbàn loh làng bè trồ ngai, tơlòng mpồl bơtiàn mờ adăt boh lam.

Cau cih Quang Sáng-Cau mblàng Ndong Brawl