VOV4.K’ho- Gah đơng lam Ling dà lềng mờ Tổng Liên đoàn Lơh broă Việt Nam pa kĭ hơ Broă lơh pơgồp bal mblàng yal dà lềng bồt bơlào tơngai bơh nam 2021- 2026. Ală nam do, Tổng Liên đoàn Lơh broă Việt Nam mờ Gah đơng lam Ling dà lềng neh pơgồp bal bơyai lơh uă broă lơh geh kuơ ngan, dờng màng ngan kah tus dà lềng, bồt bơlào bơh Dà lơgar dê; sùm lam ală mpồl lòt còp, pơndờm pơnđiang cau ling, kuang bàng mờ làng bol tàm bồt Trường Sa.

Tổng Liên đoàn Lơh broă Việt Nam lam lơh, hòi jà đoàn viên công đoàn, cau lơh broă tă pơgồp bal, dong kờl bal Kes priă Dà lềng bồt bơlào ƀòn lơgar; pà kuang bàng, cau ling bồt Trường Sa in uă phan pơrya ai bơta tam klăc đềt mềr đah rơnàng công nhân mờ Mpồl ling dà lềng làng bol Việt Nam. Broă lơh pơgồp bal tơngai bơh nam 2021- 2026 geh 6 tơngume. Tàm hơ̆, tơrgùm tàm ală broă lơh geh gơrềng tus dà lềng, bồt bơlào Việt Nam; lam lơh srơh làng bol jơh gùt lơgar mờ làng bol he ơm tàm lơgar ndai kah tus ling klàng mờ làng bol kơnhoàl bồt Trường Sa mờ Hìu dra DK1...

Cau mblàng Lơ Mu K’Yến