VOV4.K’ho- Cư Elang là xã ngài bơh kơnhoàl Ea Kar, càr Dăk Lăk dê, rềp nhàr mờ xã Vụ Bổn (kơnhoàl Krông Pach), xã Cư Pui (kơnhoàl Krông Bông) mờ xã Cư Bông (kơnhoàl Ea Kar). Jơh bal 3 xã rềp nhàr ndrờm neh geh ală tiah geh kòp Covid-19 tàm mpồl bơtiàn. Mìng is Cư Elang ơm tàm gùl 3 xã geh kòp, mơya tài geh bơta ring bal bơh làng bol dê mờ ală broă lơh rơcang sơndră kòp jơh nùs bơh gơnoar atbồ dê, xã neh ờ geh cau bơtờp kòp Covid-19, gàr kơ̆ kơljap bơtàu tơnguh lơh sa mpồl bơtiàn.

Anih tam cah is tơrgùm bal lơh tàm Hìu đơng lam ngui bơtơt rbòng dà Ea Rớt ngài mờ ƀòn làng bol ơm kis mơya dờng niam ngan. Do là anih tam cah is gơ wèt mờ ală cau bơh xã Cư Elang dê rê bơh ală càr tiah đah jum dà lơgar nàng rơcang sơndră kòp Covid-19. Lơh jat kơnòl broă tàm do, Phó Kuang atbồ Hìu sơnơm xã Cư Elang bi Nguyễn Thị Yến pà git, anih do pa geh ai ngui nàng lơh anih tam cah is bơh lồi nhai 8. Lài hơ̆, xã geh 2 anih tam cah is tơrgùm bal lơh tàm hìu bơsram kấp 2 Phạm Hồng Thái mờ hìu bơsram kấp 1 Nguyễn Thái Học. Tơngai lồi nhai 7 nam 2021, jơh bal 2 anih lam lơh tam cah is ai 208 nă cau rê bơh tiah geh kòp in. Geh làng bol tàm ƀòn lơgar mờ 2, 3 nă cau geh nùs nhơm niam dong kờl phe, phan sa, tơl nă cau iang nùs lơh jat niam broă tam cah is tơrgùm bal 14 ngai, tơnơ̆ hơ̆ pơn jat tai rê tam cah is tàm hìu 14 ngai tai. Lồi nhai 8, mìng gam rlau 10 nă cau pal tam cah is tơrgùm bal, geh ntrờn jun tus Hìu đơng lam ngui bơtơt rbòng dà Ea Rớt, dờp wơl ală hìu bơsram nàng wàs lơh kloh khuẩn rơcang ai nam bơsram pa in. Bi Nguyễn Thị Yến yal, kơnờm geh bơta ring bal bơh làng bol bal mờ mpồl lơh geh gơnoar tàm xã Cư Elang dê neh kơryan geh cồng nha ờ lời kòp Covid-19 mut bơtờp tàm xã: “Xã lam lơh jơh ală mpồl rơcang sơndră kòp Covid-19 mpồl bơtiàn, mpồl lơh sơnơm thôn, ƀòn, mpồl atbồ is... tŭ sền gŏ cau bơh tiah geh kòp rê pơn yơu bè Vụ Bổn, Cư Bông den pal yal mơ, đơs bal là lơh niam ngan. Bè pa do, geh 2 nă cau bơh Cư Bông tus ñô sa den khi git gŏ mơ mờ neh tơmut tàm anih tam cah is tơrgùm bal. Gah lơh sơnơm neh mblàng yal sùm, ai làng bol tàm do neh git wă niam ngan, ngan là làng bol kòn cau den khi lơh jat sơlơ niam, khi ờ pleh ờ”.

Cau bơh ală tiah ndai tus Cư Elang ndrờm pal yal bè tiah lòt rê

Di bè jơnau đơs bơh Phó Kuang atbồ Hìu sơnơm xã Cư Elang dê, jơnau git wă bơh làng bol dê neh dong xã sơndră kòp geh cồng nha. Tŭ ờ hềt geh anih tam cah is tơrgùm bal, cau bơh ală càr geh kòp rê hờ Cư Elang neh lơh jat nền nòn ngan broă tam cah is tàm hìu. Tŭ ală tiah ờ huan ai lòt rê, làng bol tàm xã hòi điện thoại pơn jờng oh kòn bañ rê, lơh jat nền nòn broă ơm yah ngài mpồl bơtiàn nàng ờ lơh bơtờp kòp. Bi Vàng Seo Pao, ơm tàm ƀòn ơm kis pa sồ 1 – bơtơt rbòng dà Krông Pách Thượng, xã Cư Elang pà git: “Dilah rê kung pal tam cah is, mờ ơm tàm hơ̆ kung gam tam cah is den 2 nă ùr bơklau sơnơng là pơn jờng sồr kòn ơm wơl tềng hơ̆ tơn, tơnơ̆ do jơh kòp den lòt lơh broă wơl. Là pơn jờng oh kòn pal ơm tàm hơ̆ lơh jat niam, bañ lòt tiah lơi”.

Jat ồng Trần Văn Thanh, Chủ tịch Ủy ban Nhân dân xã Cư Elang yal, tàm khà 11 thôn, ƀòn bơh xã dê den ƀòn ơm kis pa sồ 1 gam kal ke ngan rlau jơh, tài bơh ờ uă làng bol kung gam ntrờn bơh tiah tơnau dơng dà tàm xã Cư San (kơnhoàl M’Drăk) rê. Rơcang sơndră kòp Covid-19, xã neh hòi jà ală mpồl lơh broă tàm ƀòn lơgar, crơng gơs 10 mpồl tàm pơ dờn dong làng bol lơh hìu, jat nùs nhơm “cau tus lài dong cau tus tơnơ̆”. Tàm jơh gùt ù tiah, xã tơnguh gơnoar broă bơh làng bol dê bal mờ ală mpồl lơh sơnơm, rơcang gàr ƀòn, kuang àng xã, sền gròi nền nòn cau lik mut, lơh jat nền nòn broă yal bè tiah lòt rê. Bơta ring bal dùl nùs bơh làng bol dê neh pơgồp bơnah dong Cư Elang kơryan geh cồng nha ờ lời kòp Covid-19 mut bơtờp, bulah ơm tàm gùl 3 xã geh kòp là xã Vụ Bổn (kơnhoàl Krông Pach), xã Cư Pui (kơnhoàl Krông Bông) mờ xã Cư Bông (kơnhoàl Ea Kar). Ồng Trần Văn Thanh đơs loh rlau: “Mìng is rềp mờ xã Vụ Bổn den tŭ do bol hi kung gam gàr 4 anih gròi sền, geh ală mpồl atbồ is thôn, mpồl rơcang gàr ƀòn, kuang àng xã, sồr lơh jat nền nòn, ờ ai ală hìu bơnhă làng bol tàm tiah gam lơh jat jơnau sồr sồ 16 den ờ geh lòt gan xã. Mờ tiah rềp xã Cư Bông den bol hi geh ală mpồl lơh broă làm bă tiah. Jơh gùt xã den geh 50 mpồl lơh broă kòp Covid-19 mpồl bơtiàn, tơl mpồl drơng broă gròi sền bơh 30 tus 50 hìu bơnhă làng bol, gơ jat bè khà kờp làng bol tơl thôn. Bơh broă dờp git tơl mpồl dê den sùm yal tàm mpồl zalo, pơn yơu bè geh cau lơi pal tam cah is den ală mpồl ndrờm git lơm, mpồl atbồ is thôn git, dilah git gŏ khi ờ lơh jat halà geh tềl tơnggŏ lơi den bol hi ai mơ mpồl lơh broă tus lùp sền, ờ kờp ngai mang”.

Lơngăp lơngai tàm ƀòn ơm kis pa sồ 1 tàm Cư Elang

Gơtùi đơs, mờ ală broă lơh jơh nùs bơh gơnoar atbồ bơh xã dê, bơta ring bal dùl nùs bơh làng bol ală jơi bơtiàn kòn cau dê, xã Cư Elang, kơnhoàl Ea Kar, càr Dăk Lăk gam gàr kơ̆ bơta ring lơngai, sền gàr tiah ờ geh kòp tàm bơta gùt dar tiah geh kòp Covid-19, dong làng bol iang nùs gàr kơ̆ kơljap rài kis.

Cau mblàng K’Duẩn